ەكىباستۇزدان مايقايىڭ كەنتىنە اۋىزسۋ جەتكىزەتىن ۇلكەن قۇبىر جارىلدى. بۇل تۋرالى پاۆلودار وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
اقاۋ ديامەترى 1020 مم-لىك قۇبىردان شىققان. قازىر كەنتتى اۋىزسۋمەن جابدىقتاۋ تومەن قىسىمدا جۇرگىزىلىپ جاتىر.
«21 اقپان كۇنى باياناۋىل اۋدانىنىڭ مايقايىڭ كەنتىنە ديامەترى 1020 مم سۋىق سۋمەن جابدىقتاۋ قۇبىرىندا اقاۋ انىقتالدى. اقاۋدىڭ ۋچاسكەسى «ەكىباستۇز قالالىق سۋ ارناسى» مكك ەكىنشى كوتەرگىش سورعىسىنان 27 كم قاشىقتىقتا ورنالاسقان. وقيعا ورنىنا ءوڭىر باسشىسى اسايىن بايحانوۆ، ەكىباستۇز قالاسىنىڭ جانە باياناۋىل اۋدانىنىڭ باسشىلارى، سونداي-اق، وبلىستىق تجد باسشىسى بارىپ، جەدەل شتاب ۇيىمداستىرىلدى. اقاۋدىڭ سەبەبىن انىقتاۋ جانە جويۋ جۇمىستارى «ەكىباستۇز قالالىق سۋ ارناسى» مكك كۇشتەرىمەن جۇرگىزىلىپ جاتىر. جوندەۋ جۇمىستارىنا 30 ادام جانە 10 بىرلىك مامانداندىرىلعان تەحنيكا جۇمىلدىرىلدى. سونداي-اق، وقيعا ورنىندا پاۆلودار وبلىسى تجد جانە «مايقايىڭالتىن» اق ماماندارى جۇمىس ىستەۋدە»، دەپ مالىمدەدى ءوڭىر اكىمىنىڭ ءباسپاسوز قىزمەتى.
سونداي-اق، مايقايىڭ كەنتىنىڭ اۋىزسۋ تۇتىنۋشىلارى سۋدان اجىراتىلعان جوق. سۋمەن جابدىقتاۋ تومەن قىسىمدا جۇرگىزىلىپ وتىر.
ايتا كەتەيىك، ەكىباستۇز بەن مايقايىڭ كەنتى ارالىعىنداعى قۇبىردىڭ ۇزىندىعى — شامامەن 28-30 كم.
