پاۆلوداردا قىز ۇزاتۋ تويىنا بارعان قوناقتار جاپپاي ۋلانىپ قالدى. وقيعا وبلىس ورتالىعىنداعى بانكەت زالىنىڭ بىرىندە ورىن العان. بۇل تۋرالى ۇزاتىلعان قالىڭدىق ازيزا يساباي ۆيدەو جاريالادى، دەپ حابارلايدى “ادىرنا”.
تويدان كەيىنگى كەلەسى كۇنى بىرنەشە ادام وزدەرىن ناشار سەزىنىپ، اۋىرا باستاعان. 8 ماۋسىم كۇنى ءىش ءوتۋ، قۇسۋ جانە دەنە قىزۋىنىڭ كوتەرىلۋى بەلگىلەرىمەن جەدەل جاردەمگە 33 ادام جۇگىنگەن، ونىڭ ىشىندە ءبىر جۇكتى ايەل مەن ءبىر بالا بولعان.
“26 ەرەسەك ناۋقاس اۋرۋحاناعا جەتكىزىلدى، بالا وبلىستىق بالالار اۋرۋحاناسىنا جاتقىزىلدى. ناۋقاستاردىڭ بارلىعىنا تاعامنان ورتاشا اۋىرلىقتاعى ۋلانۋ دياگنوزى قويىلدى، جاعدايى اۋىر ناۋقاستار جوق”، – دەپ حابارلادى وبلىستىق جەدەل جاردەم ستانتسياسىندا.
ال 9 ماۋسىمدا تويعا بارعان باسقا دا ناۋقاستاردا مەديتسينالىق كومەككە جۇگىنگەن. بارلىعى 15 ادام جۇقپالى اۋرۋلار اۋرۋحاناسىنا جەتكىزىلسە، 14 ادام ۇيلەرىنەن ەم الۋعا جىبەرىلدى.
“بۇگىنگى كۇنى اۋرۋحاناعا جاتقىزىلعانداردىڭ جاعدايى ينتوكسيكاتسيا، ديارەيا جانە گيپەرتەرميالىق سيندرومعا بايلانىستى ورتاشا اۋىر دەپ باعالانۋدا. ولار تولىقتاي ەم قابىلداپ جاتىر. ال امبۋلاتورلىق ەمدەلۋدەن وتكەندەرگە ۇسىنىستار بەرىلدى”، – دەپ حابارلادى دەنساۋلىق ساقتاۋ باسقارماسىندا.
ۇزاتىلعان قالىڭدىق ازيزا يساباي مۇنداي جاعداي مەيرامحانا اسحاناسىنىڭ كەسىرىنەن بولعانىن ايتادى.
“سالات جەگەن قوناقتاردىڭ بارلىعى ۋلانعان. سالات جەمەي، ءبالىش قانا جەپ، شىرىن ىشكەن كۇيەۋمىز ەكەۋمىز جانە قوناقتاردىڭ بالالارى امان قالدى. بانكەت زالىنىڭ اسحاناسىنان سىناما الىندى، جاۋابىن كۇتەمىز”، – دەپ اشۋلى ازيزا يساباي.
ونىڭ ايتۋىنشا، بانكەت زالىنىڭ اكىمشىلىگى قوناقتاردىڭ جاپپاي ۋلانىپ جاتقانىن بىلە تۇرا، شارالار وتكىزۋدى جالعاستىرىپ وتىر.
