Jyl basy qalaı tańdaldy? (ertegi)

2120

Buryn erte zamanda haıýandar jyl aǵasy bolýǵa talasypty. Sonda jylqy turyp:

– Men alysty jaqyn qylamyn. Kúshimdi bolsa kóredi, sútimdi bolsa ishedi, qylyma sheıin arqan, jip esedi. Adamǵa menen paıdaly mal joq, jyl aǵasy men bolamyn, – deıdi.

Túıe aıtady: – Sen adamnyń jumysyn qylsań, suly, shóp asaıtyn tamaǵyń úshin qul boldyń. Mine, men sen kótere almaıtyn aýyrdy kóterip, neshe aılyq alys jerlerge baramyn. Ash boldym dep, arpa, suly suramaımyn. Kóde bolsa, kóde, jýsan bolsa, jýsan, ne kez kelse, sony qorek etip, tabylsa, sý iship, tabylmasa, shólde de jolǵa júre beremin. Jyl basy bolý maǵan laıyq.

Sıyr aıtady: – Adam egin ekse, meni jegedi, sútimdi ishedi, qurt-maı isteıdi, jyl basy bolý maǵan laıyq.

Qoı aıtady: – Men bolmasam, qazaq úıin nemen jabar edi. Júnimdi alyp, kıiz basady, jabaǵymnan kıim tigedi, arqan, jip esedi. Sútimnen qurt-maı alady, sharýaǵa menen paıdalylaryń joq.

It aıtady: – Men bolmasam, senderdiń kóbińdi ne urlap, ne qasqyr jep taýysar edi. Men senderdiń barshalaryńnyń baqtashyńmyn, dushpan kórinse, úrip, abalap, ıeme habar beremin.

Taýyq aıtady: – Men bolmasam, adamdar erte jumysyna barmaı, uıyqtap qalar edi. Men erte turyp, tań atty dep shaqyryp, habar aıtamyn. Kesh bolsa, jatar mezgil boldy dep, taǵy shaqyramyn.

Tyshqan ne aıtaryn bilmeı turady da bir túrli qýlyq oılap, jıylǵan kópke bylaı deıdi:

– Bul talastan esh nárse ónbes, jyldy qarap turalyq ta, kim buryn kórse, sol jyl basy bolsyn. Ózgeleri qarap turǵanda, túıe óziniń boıyna senip: «Menen buryn kim kóredi?», – dep, tyshqannyń sózin qostap, bári qarasyp turady.

Birazdan soń tyshqan jorǵalap, túıeniń ústine shyǵyp, órkeshiniń basyna minip otyrady. Kóp haıýan talasyp: «Biz kóremiz, biz kóremiz»,– dep turǵanda, eń bıikte otyrǵan tyshqandy elemepti. Sodan soń jyldy bárinen buryn tyshqan kórip, habar berip, jyl basy bolypty.


massaget.kz

Pikirler
Redakııa tańdaýy