Qoǵamda sybaılas jemqorlyqqa qarsy tózbestik ahýalynyń qalyptasýynyń, azamattardyń sybaılas jemqorlyqqa qarsy mádenıetiniń joǵarylaýynyń múmkindigin arttyratyn faktorlardyń biri - halyqtyń quqyqtyq saýattylyǵynyń artýy.
“Ádildik joly” Respýblıkalyq qoǵamdyq birlestigi qyzmetiniń basym baǵyttarynyń biri - azamattardyń quqyǵyn qorǵaý jáne qoljetimdi quqyqtyq kómekpen qamtamasyz etý. Birlestik Respýblıkalyq zań konsýltanttary Palatasymen ózara yntymaqtastyq memorandýmyna qol qoıý arqyly osy qyzmetti belsendi júzege asyryp keledi.
Birlestiktiń barlyq óńirdegi fılıaldary apta saıyn azamattardy qabyldaý júrgize otyryp, halyqty tolǵandyrǵan talaı áleýmettik máseleleriniń ońtaıly sheshimin tabýǵa kómek kórsetýde. Jáne eń bastysy barlyq qyzmet, keńester tegin júzege asyrylatynyn eskerý qajet.
“Ádildik joly” Respýblıkalyq qoǵamdyq birlestiginiń Shymkent qalasyndaǵy fılıaly Shymkent qalalyq Zań konsýltanttary Palatasymen birlese otyryp qala halqyna tegin zań keńesterin berý máselesimen turaqty túrde aınalysyp keledi. Sonymen qatar, eger áleýmettik osal topqa jatatyn azamat bolsa (kóp balaly analar, jalǵyzbasty ata-analar, múgedekter jáne t.b.) tegin keshendi zańger kómegin alýǵa múmkindigi bar.
Osy rette shalǵaı aýyldaǵy aǵaıynnyń da jaǵdaıy nazardan tys qalmady. Tikeleı zańger kómegi qoljetimsiz aımaqtarda jáne jalpy kez-kelgen azamattyń qalaýy boıynsha onlaın túrde tegin zańgerlik keńes alýyna múmkindik jasaldy. Ol úshin uıaly telefonǵa “Lawcenter” qosymshasyn júktep alý jetkilikti. Kez-kelgen smartfonǵa júkteý múmkindigi qarastyrylǵan bul qosymsha arqyly ózekti suraqtary boıynsha kez-kelgen adam respýblıkanyń bilikti zańgerlerinen tegin quqyqtyq keńes ala alady.
Qazirgi tańda júzdegen adam úıden shyqpaı-aq, “qaltadaǵy zańger” atalyp ketken “Lawcenter” qosymshasy arqyly sapaly zańgerlik keńeske qol jetkizip otyr. "Zańdy bilmeý jaýapkershilikten bosatpaıtynyn" eskersek, bul jaǵymdy jańalyqtyń jurtymyz úshin mańyzy zor.
Aıjan Kesebaeva “Ádildik joly” RQB Shymkent qalasyndaǵy fılıalynyń basshysy
