Qaiyrymdylyqqa bölıngen milliardtardy jymqyrdy degen Perizat Qairattyŋ ısıne bailanysty sot otyrysy ötıp jatyr. Būl joly Gaza halqyna gumanitarlyq kömek körsetuge qatysty epizod qaraluda, dep habarlaidy “Adyrna”.
Iste jäbırlenuşı retınde tanylǧan «Asar-Ume» qaiyrymdylyq qorynyŋ prezidentı Ashat Nūrmaşev sotta ekı taraptyŋ arasyndaǧy ärıptestıkke bailanysty jaittardy baiandady.
Belgılı bolǧandai, «Asar-Ume» qory «BizBirgemiz Kazakhstan 2030» qoryna 200 million teŋge audarǧan.
Ashat Nūrmaşevtyŋ aituynşa, būl bastama 2023 jyldyŋ qaraşasynda, iaǧni Taiau Şyǧystaǧy jaǧdai uşyǧa tüskennen keiın paida bolǧan. Sol kezde äleumettık jelıler men būqaralyq aqparat qūraldarynda Perizat Qairat basqaratyn qordyŋ Palestina elşılıgımen ärıptestık ornatqany jäne Abu-Dabidegı halyqaralyq gumanitarlyq habqa qol jetkıze alatyny turaly aqparat taraǧan. Keiın būl mälımettı Perizat Qairattyŋ özı «Asar-Ume» ökılderımen kezdesude rastaǧan.
«Bız Abu-Dabige bırge bardyq. Halyqaralyq gumanitarlyq jük tieletın qoimany aralap kördık. Būl – Almatydaǧy qoima emes, oǧan akkreditasiiasyz kıru mümkın emes. Bızge būryn satyp alynǧan jükterdıŋ sol jerde tūrǧanyn körsettı», – dedı Nūrmaşev sot otyrysynda.
Alaida onyŋ aituynşa, būl jüktıŋ baryn rastaityn eşqandai resmi qūjat ūsynylmaǧan. Barlyq aqparat tek Perizat Qairattyŋ sözıne negızdelgen.
Nūrmaşevtyŋ mälımetınşe, Abu-Dabige sapardan jäne Astanada BAÄ men Palestina elşılıkterı ūiymdastyrǧan şaralarǧa qatysqannan keiın, onyŋ qory Gaza sektoryna arnap qarajat jinaudy bastaǧan. Bar bolǧany bes künnıŋ ışınde qazaqstandyqtar 293 million teŋge qaiyrymdylyq jasaǧan.
«Bız būl somany tranşpen, iaǧni är joly 50 million teŋgeden audarudy josparladyq. Bıraq Perizat barlyq aqşany bırden audarudy talap ettı. Aqyldasa kele, bız 200 million teŋgenı jıberdık. Qalǧan 93 million teŋge tek esep-qisap ūsynylǧannan keiın audarylady dep kelıstık», – dedı jäbırlenuşı tarap.
Onyŋ aituynşa, ekı qor arasynda qaiyrymdylyq baǧytyndaǧy ärıptestık turaly kelısım jasalǧan. Alaida, qarjy audarylǧan kezde de, odan keiın de eşqandai esep berılmegen.
Prokurordyŋ «Abu-Dabidegı qoimadan «BizBirgemiz» qorynyŋ logotipı bar jük qoraptaryn kördıŋız be?» degen sūraǧyna Nūrmaşev terıs jauap berdı. Ol sondai-aq, ol jerden Perizat Qairattan basqa qor ökılderın körmegenın atap öttı.
«Perizat Qairat satyp aldy degen tauarlarǧa qatysty da bırde-bır qūjat ūsynylǧan joq. Barlyǧy tek onyŋ sözıne süienıp jüzege asty», – dep qosty ol.
Nūrmaşevtyŋ sözınşe, Abu-Dabige sapar şyǧyndaryn Perizat Qairattyŋ özı kötergen.
Keiın ol qor tarapynan ūsynylǧan barlyq qūjattyŋ jalǧan ekenın bılgenın aitty.
