Qazaqstan ışkı ıster ministrlıgıne qarasty Qylmystyq-atqaru jüiesı komitetı sottalǧan supermarafonşy Marat Jylanbaevtyŋ densaulyǧy qanaǧattanarlyq jaǧdaida ekenı turaly aqparat taratty, dep habarlaidy "Adyrna" ūlttyq portaly QazTAG-qa sıltep.
«Jylanbaev sot ükımımen kelıspegendıkten, tamaqtan bas tartatynyn mälımdegen. Alaida beinebaqylau kameralaryndaǧy jazbalarǧa säikes, ol su, şai jäne kompot ışıp, taŋerteŋ dene jattyǧularyn jasap jür. Densaulyq jaǧdaiy – qanaǧattanarlyq. Ol medisinalyq qyzmetkerlerdıŋ tūraqty baqylauynda. BAQ-ta taraǧan onyŋ salmaǧy 45 kelı degen aqparat şyndyqqa janaspaidy», – delıngen resmi organ taratqan habarlamada.
Vedomstvonyŋ mälımetınşe, Jylanbaev QAJ departamentı basşylyǧymen, qadaǧalau organdary jäne adam qūqyqtaryn qorǧau ūiymdary ökılderımen bırneşe märte jeke qabyldauda bolǧan. Sondai-aq oǧan Adam qūqyqtary jönındegı uäkılden resmi tüsındıru haty joldanǧan. Odan eşqandai aryz-şaǧym tüspegen.
Marat Jylanbaev – 62 jastaǧy qazaqstandyq marafonşy, ultramarafon jarystarynyŋ jeŋımpazy ärı jüldegerı. Ol jetı bırdei Ginnestıŋ rekordtar kıtabyna engen älemdık rekord ornatqan. Aziia, Afrika, Avstraliia jäne Amerika qūrlyqtarynda jügırıp ötken jer betındegı jalǧyz adam.
Saiasi belsendılıgımen de tanymal bolǧan Jylanbaev mäjılıs deputattyǧyna kandidat bolyp, oppozisiialyq partiia qūruǧa talpynǧan.
2023 jyldyŋ qaraşasynda Astana qalasynyŋ qylmystyq ıster jönındegı audanaralyq soty ony «tyiym salynǧan ekstremistık ūiymdy qarjylandyrdy jäne onyŋ jūmysyna qatysty» degen aiyppen 7 jylǧa bas bostandyǧynan aiyryp, 3 jyl qoǧamdyq-saiasi qyzmetpen ainalysuǧa tyiym salu jazasyn taǧaiyndaǧan. Sot prosesı jabyq jaǧdaida ötken.
Eske salaiyq, būǧan deiın de qūqyq qorǧauşy Baqytjan Töreǧojina Marat Jylanbaevtyŋ esı kıresılı-şyǧasyly küide jatqanyn habarlaǧan edı.
