Qazırdıŋ özınde 40 myŋ azamatymyz ludomaniiadan zardap şekkenı resmi anyqtaldy. Qūmar oiyn myŋdaǧan otbasynyŋ şyrqyn būzyp, ajyrastyryp, köptegen balany tırı jetımge ainaldyrdy.
Bas prokuraturanyŋ deregıne säikes, biyl Qazaqstanda qūmar oiyndar men qaryzǧa batudyŋ kesırınen şamamen 200-ge juyq adam öz-özıne qol jūmsaǧan. Būl tek Qazaqstannyŋ ǧana emes bükıl älem elderınıŋ bas auyruyna ainalǧan problema.
Degenmen, Bas prokuraturanyŋ mälımetı boiynşa oiynǧa qūmar azamattarymyzdyŋ sany boiynşa memlekettıŋ älı de tolyq tüsınıgı joq.
«Öz-özıne qol jūmsau mäselesıne keletın bolsaq, jalpy älemde ludomaniia kesırınen suisidtıŋ 15 ese ösuı baiqalady. Eŋ qorqynyştysy, jastar jappai bäs tıguge qūmar bolyp bara jatyr. Qaryzǧa batyp, öz-özıne qol jūmsaǧan oqu ornynyŋ studentterı bar, ata-anasynyŋ ömırın qiǧandar bar, dosyn öltırgender taǧy bar», – deidı QR BP basqarmasynyŋ bastyǧy Maqsat Oraqbaev.
Būdan bölek Aqtöbede ekı sport mektep direktorynyŋ alaŋdardy zaŋsyz jalǧa beruden tapqan 12 mln teŋgenı bäske tıgıp jıbergenı anyqtaldy.
Eŋ maŋyzdysy būl jüielı türde qaitalanyp jatqan oqiǧalar. Sondyqtan da qūmar oiyndar mäselesıne būdan bylai köz jūma qarauǧa bolmaidy. Joǧaryda atalǧan olqylyqtyŋ ornyn toltyryp, bukmekerlerdıŋ jauapkerşılıgın arttyru üşın «Bıryŋǧai esepke alu jüiesı» ıske qosylady.
Aiqyn jüie, bıryŋǧai ereje men tūraqty monitoring biznes nemese qarapaiym adamdardy şekteu nietımen emes, būl salada tärtıp ornatu qajettılıgımen bailanysty.
