Qaraǧandy oblysynda erekşe bılım beru qajettılıkterı bar balalar üşın qolaily ärı sapaly bılım beru ortasyn qalyptastyru jūmystary jüielı türde jalǧasuda. Jyl soŋyna deiın Būqar jyrau audanynda psihologiialyq-pedagogikalyq tüzetu kabinetı aşylady dep josparlanǧan. 2026 jyly Temırtauda autizmı bar balalardy qoldau ortalyǧy ıske qosylady, al Qaraǧandyda aqyl-oi damuynda auytquy bar balalarǧa arnalǧan arnaiy mektep-internat aşylmaq. Būl turaly pedagogterdıŋ dästürlı tamyz konferensiiasynda aityldy.
– Qazırgı taŋda erekşe bılım beru qajettılıkterı bar balalardyŋ 85 paiyzy psihologiialyq-pedagogikalyq qoldau men erte tüzetu qyzmetterımen qamtylǧan. Qamtudy odan ärı keŋeitu üşın arnaiy bılım beru ūiymdarynyŋ sanyn arttyru baǧytynda jūmys jürgızılude, – dedı oblystyq bılım basqarmasynyŋ mındetın atqaruşy Meiırjan Syzdyqov.
Jaŋa oqu jylynda Qaraǧandy qalasyndaǧy №4 mektep-internatta aqyl-oiynyŋ damuy jeŋıl jäne ortaşa deŋgeide būzylǧan balalarǧa arnalǧan tört arnaiy synyp aşylady. Däl osyndai synyptar №1 arnaiy mektep-internatta da jūmys ısteidı.
2026 jyly Qaraǧandyda aqyl-oi kemıstıgı bar balalarǧa arnalǧan on bırınşı arnaiy mektep-internattyŋ aşyluy josparlanǧan.
Bügınde oblysta jyl saiyn şamamen 400 balaǧa kömek körsetetın Autizm ortalyǧy jūmys ısteidı. Alaida öŋırde osyndai taǧy bır ortalyq aşu qajettılıgı tuyndap otyr.
– Erekşe qajettılıkterı bar balalar üşın qoljetımdı ärı sapaly bılım beru ortasyn qūru – bızdıŋ basty mındetterımızdıŋ bırı. Biylǧy jyldyŋ soŋyna deiın barlyq bılım beru ūiymdarynda mümkındıgı şekteulı balalardy qajettı jaǧdailarmen tolyq qamtamasyz etudı tapsyramyn. Sondai-aq, 2026 jyly Temırtauda autizmı bar balalarǧa qoldau körsetu ortalyǧyn jäne Qaraǧandyda aqyl-oi damuynda auytquy bar balalarǧa arnalǧan arnaiy mektep-internat aşu qajet. Būdan bölek, Buhar-Jyrau audanynyŋ äkımdıgıne bılım basqarmasymen bırlesıp osy jyldyŋ qaraşasyna deiın psihologiialyq-pedagogikalyq tüzetu kabinetın ıske qosudy jükteimın. Keler jyly osyndai şaralar öŋırdıŋ barlyq aumaǧynda jüzege asyryluy tiıs, – dedı Qaraǧandy oblysynyŋ äkımı Ermaǧanbet Bölekpaev.
Biylǧy qyrküiekten bastap oblystaǧy barlyq arnaiy mektep-internattarǧa resurstyq ortalyq märtebesı berıledı. Eger qazır inkliuziiany qoldau baǧytynda nebärı ekı oblystyq resurstyq ortalyq jūmys ıstep tūrsa, küzge qarai olardyŋ sany on ekıge jetpek.
