Qazaqstan Prezidentı Qasym-Jomart Toqaev halyqqa arnaǧan Joldauynda el ekonomikasyn jaŋǧyrtu üşın Jasandy intellekt jäne sifrlyq damu ministrlıgın qūrudy ūsyndy, dep habarlaidy "Adyrna" ūlttyq portaly Aqordanyŋ baspasöz qyzmetıne sılteme jasap.
Toqaevtyŋ aituynşa, eŋ aldymen, Sifrlyq kodekstı qabyldau qajet. Onda sifrlandyru üderısınıŋ basty baǧyttary – jasandy intellekt, platformalyq ekonomika, ülken derekterdı paidalanu jäne basqa da mäseleler aiqyndaluy tiıs.
Prezident jaŋa tehnologiialyq jüiege beiımdelu üşın memlekettık basqarudy qaita qūrudyŋ maŋyzdylyǧyn erekşe atap öttı. Onyŋ sözınşe, basqaru jüiesı azamattardyŋ müddesıne sai boluy, aşyqtyq pen tiımdılıktı arttyruy kerek.
«Sondyqtan qazırgı qūzyrly ministrlıktıŋ negızınde Jasandy intellekt jäne sifrlyq damu ministrlıgın qūru qajet dep sanaimyn. Jaŋa ministrlıktı Premer-ministrdıŋ orynbasary deŋgeiındegı maman basqaruy tiıs», – dedı Q.Toqaev.
Memleket basşysy Ükımetke ekonomikanyŋ barlyq salasynda jasandy intellektını keŋınen engızudı tapsyrdy. Ol Qazaqstannyŋ bäsekege qabılettı el retınde damuy üşın jūmysty mülde jaŋa täsılmen jürgızu qajettıgın basa aitty
