Ūlytau oblysynyŋ äkımı Dastan Ryspekovtıŋ töraǧalyǧymen QR Prezidentı Q.K. Toqaevtyŋ «Jasandy intellekt däuırındegı Qazaqstan: özektı mäseleler jäne ony tübegeilı sifrlyq özgerıster arqyly şeşu» atty Qazaqstan halqyna arnaǧan Joldauyn talqylau boiynşa jiyn öttı.
Is-şaraǧa memlekettık organdardyŋ basşylary, deputattar, sarapşylar qauymdastyǧy, azamattyq qoǧam ökılderı, käsıpkerler jäne jastar qatysty.
Oblystyq mäslihattyŋ deputaty Svetlana Jumkina Memleket basşysynyŋ Joldauyn el damuynyŋ jaŋa kezeŋıne jol aşatyn strategiialyq qūjat ekenın atap öttı. Ol Joldauda köterılgen jetı basym baǧyttyŋ ärqaisysy – uaqyt talaby men el bolaşaǧy üşın maŋyzdy şeşımder ekenıne nazar audardy. Äsırese, jasandy intellekt, sifrlandyru, bılım beru jäne jūmysşy mamandyqtarynyŋ bedelın arttyru baǧytyndaǧy bastamalar - keleşek ūrpaqtyŋ damuyna negız bolatynyn atap öttı.
Ūlytau oblysynyŋ käsıpkerlık jäne önerkäsıp basqarmasynyŋ basşysy Daniiar Arynǧazin 2025 jyldyŋ 7 aiyndaǧy investisiialyq ahual men turizm salasynyŋ damu körsetkışterımen bölıstı. Biylǧy jyly öŋır ekonomikasyna tartylǧan investisiia kölemı 103,4 mlrd teŋgege jetıp, ötken jyldyŋ säikes kezeŋımen salystyrǧanda 9%-ǧa ösken. Qazırgı uaqytta jalpy qūny 937 mlrd teŋgenı qūraityn 22 ırı joba jüzege asyryluda, olar 2 myŋnan astam jaŋa jūmys ornyn aşuǧa mümkındık beredı.
Jiyn barysynda oblystyq sifrlyq tehnologiialar basqarmasy öŋırde jüzege asyrylyp jatqan bırneşe innovasiialyq jasandy intellekt (Jİ) jobalary turaly mälımet berdı. Mäselen, Jezqazǧan qalasynyŋ joldaryn sifrlandyru jobasy şūŋqyrlardy anyqtap, jol belgılerın ornatu boiynşa ūsynystar engızedı.
VisionGuardAI beinemonitoring jüiesı 11 äleumettık nysanda ornatylyp, qauıpsızdıktı qamtamasyz etedı. «109 bıryŋǧai bailanys ortalyǧy» Mindia meta-platformasynyŋ kömegımen tapsyrmalar avtomattandyrylyp, ötınışter jyldam öŋdelude. Sonymen qatar, «Protokol» jüiesı keŋes otyrystarynyŋ audiojazbalaryn mätınge ainaldyrady, al Jİ-audarmaşy memlekettık qūjattardy qazaq jäne orys tılderıne sapaly audarady.
Ūlytau Habta Scout AI, DocGuard AI, Talapker AI jäne WorkClock siiaqty innovasiialyq jobalar äzırlenıp, qūjat ainalymy, bılım jäne eŋbek önımdılıgın arttyru baǧytynda ıske asyryluda. Oblystyq sifrlyq tehnologiialar basqarmasynyŋ basşysy Ermek Jazylhanūly jasandy intellekt pen sifrlandyrudyŋ öŋırdıŋ damuyna jaŋa serpın berıp, memlekettık qyzmetterdıŋ sapasyn arttyratynyn atap öttı.
Oblystyq auyl şaruaşylyǧy jäne jer qatynastary basqarmasynyŋ basşysy Almat Sauhimov Joldauda belgılengen auyl şaruaşylyǧyn jaŋa deŋgeige köteru jäne jerdı tiımdı paidalanu baǧytyndaǧy tapsyrmalarǧa toqtaldy. Sifrlandyru aiasynda jerdı beru täsılderı elektrondy formatqa köşırılıp, kosmomonitoring jüiesı arqyly paidalanylmai jatqan jerler anyqtalyp, memleket menşıgıne qaitaryluda.
2023-2025 jyldary paidalanylmai jatqan jerlerdıŋ kölemı jospardan asyp oryndalyp, olar qaita ainalymǧa engızılude. Auyl şaruaşylyǧy jerlerın tiımdı paidalanu jäne zaŋ būzuşylyqtardy joiu maqsatynda arnaiy komissiia qūrylyp, naqty ūsynystar äzırlenude.
Oblystyq turistık gid Saǧdat Mūhambetov öŋırdıŋ tarihi jäne tabiǧi äleuetın atap, onyŋ ışınde Joşy han men Alaşa hannyŋ mazarlary, Aqjar borly şatqaly, Būlanty şaiqasynyŋ tarihi orny siiaqty kielı jerlerdıŋ turistık kartanyŋ maŋyzdy nysandaryna ainalatynyn jetkızdı.
Kezdesu qorytyndysy boiynşa öŋır basşysy Dastan Ryspekov Prezident Joldauynda aiqyndalǧan basym baǧyttardy jüzege asyru maqsatynda oblys äkımınıŋ orynbasarlary men tiıstı basqarma basşylaryna naqty tapsyrmalar jüktep, olardy sapaly jäne jüielı türde jüzege asyru boiynşa öŋırlık ıs-şaralar josparyn bekıtudı mındettedı.
