Qyzylorda oblysynda Qarmaqşy audanynyŋ ortalyǧynan soltüstıkke qarai 90 şaqyrym jerde ornalasqan Şah-Şah şatqalynan ejelgı januardyŋ qaldyqtary tabyldy. Aldyn ala derekterge süiensek, tabylǧan süiekter mezozoi däuırınıŋ bor kezeŋınde ömır sürgen dinozavrǧa tiesılı boluy mümkın, dep habarlaidy "Adyrna".
Erekşe olja qazır ǧalymdardyŋ qolyna öttı jäne ol ǧylymi ortada ülken qyzyǧuşylyq tudyrdy. Paleontologtar mūndai jädıgerlerdıŋ Qazaqstan aumaǧynda öte sirek kezdesetının atap öttı.
«Paleontologtardyŋ zertteu jūmystary barysynda gadrozavr otriadyna kıretın Aralozavr 93-86 mln jyl būryn ömır sürgenı anyqtalady. Keiın būl aimaq europalyq paleontolog-ǧalymdardyŋ qyzyǧuşylyǧyn tudyryp, älemdık ǧylymi jurnaldarǧa maqalalar jariialanady», - delıngen muzeidıŋ aqparatynda.
Oblystyq mūrajai men Qarmaqşy audandyq tarihi-ölketanu muzeiınıŋ qyzmetkerlerı audan territoriiasyndaǧy Şah-Şah şatqalyna barlau ekspedisiiasyn ūiymdastyrǧan.
Ekspedisiia barysynda Şah-Şah şatqalynan Bor däuırınde ömır sürgen tırşılık ielerınıŋ süiekterınıŋ qaldyqtary tabylǧan. Aldaǧy uaqytta paleontologiialyq būiymdar arnaiy mamandar tarapynan mūqiiat zerttelıp, nätijesı jūrtşylyqqa jariia etılmek.
Keşende alǧaş ret 1959 jyly orys paleontology A.Rojdestvenskiidıŋ jetekşılıgımen ǧylymi-zertteu jūmystary jürgızıledı. Boztöbe svitasynda ornalasqan şatqaldan Mezozoi erasynyŋ Bor kezeŋınde ömır sürgen dinozavrlardyŋ süiekterınıŋ qaldyqtary tabylady. 1968 jyly bas süiegı ǧana tabylǧan dinozavr «Aralozavr» degen ataumen ǧylymi ainalymǧa engenı belgılı.
