Aldaǧy ekı jylda Almaty qalasynda 38 qoǧamdyq keŋıstık jaŋartylyp, qaita qūrylady. Būl turaly Almaty qalasynyŋ äkımı Darhan Satybaldy Ortalyq kommunikasiialar qyzmetınıŋ alaŋynda ötken brifing barysynda mälımdedı, dep habarlaidy «Adyrna» ūlttyq portaly.
Qala äkımınıŋ aituynşa, poliortalyqty damytu tūjyrymdamasy aiasynda Almaty ekologiialyq tūrǧydan taza, jasyl ärı tūrǧyndarǧa jaily megapoliske ainaluy tiıs. Osy baǧytta jüzege asyrylyp jatqan jobalar qalalyq ortanyŋ sapasyn arttyruǧa, qoǧamdyq keŋıstıkterdı tiımdı paidalanuǧa jäne tūrǧyndardyŋ ömır süru deŋgeiın jaqsartuǧa baǧyttalǧan.
Atalǧan bastamalardy ıske asyruǧa London, Mäskeu, Şanhai qalalarynan jäne Qazaqstannan tartylǧan täjıribelı sarapşylar men urbanister qatysuda. Körıktendıru jūmystarynyŋ bıryŋǧai standarttaryn engızu jäne jobalardy jüielı türde üilestıru maqsatynda qalalyq Urbanistika ortalyǧy qūryldy.
«2026–2027 jyldary 38 qoǧamdyq keŋıstıktı jaŋǧyrtu jäne jaŋa demalys aimaqtaryn qūru josparlanǧan. Olardyŋ qatarynda Tūŋǧyş Prezident saiabaǧy, Äuejai kölı jaǧalauy, Esentai jäne Ülken Almaty özenderınıŋ boiy, sondai-aq basqa da qala tūrǧyndary jiı baratyn maŋyzdy aimaqtar bar. Sonymen qatar, “qasbetten qasbetke deiın” qaǧidaty boiynşa 68 köşe jaŋartylatyn bolady. Būl jūmystar aiasynda ǧimarattardyŋ syrtqy kelbetı jaŋaryp, zamanaui jaryqtandyru jüielerı ornatylady, trotuarlar töselıp, ırgeles aumaqtar abattandyrylady», — dedı Darhan Satybaldy.
Äkımnıŋ mälımetınşe, qala tazalyǧyn saqtau jäne sanitarlyq jaǧdaidy jaqsartu üşın «Almaty Tazalyq» kommunaldyq käsıpornynyŋ qyzmetı edäuır küşeitıldı. Atap aitqanda, qyzmetkerler sany 600 adamnan 2 000 adamǧa deiın artty, eŋbekaqy mölşerı 170 myŋ teŋgeden 370 myŋ teŋgege deiın ūlǧaityldy. Būdan bölek, kommunaldyq qyzmettıŋ materialdyq-tehnikalyq bazasyn jaŋartu maqsatynda 330 bırlık jaŋa arnaiy tehnika satyp alyndy.
Sonymen qatar, jasyl aimaqtardy kütıp-ūstau men damytu baǧytynda «Jasyl Almaty» bıryŋǧai operatory qūrylyp, onyŋ qaramaǧyna kezeŋ-kezeŋımen 400 gektardan astam jasyl aumaq berılude. Būǧan qosa, «Taza Qazaqstan» respublikalyq aksiiasy aiasynda jyl basynan berı Almaty qalasynda 9,4 myŋ gektardan astam aumaq tazartylyp, 58 myŋ tekşe metrden astam qoqys şyǧaryldy. Būl jūmystar aldaǧy jyldary da tūraqty türde jalǧasyn tabady.
