Aq üi basşysy Donald Tramptyŋ İran «Tomagavk» zymyrandarymen mektepke şabuyldady degen mälımdemesı aqylǧa qonymsyz. Būl turaly AQŞ senatyndaǧy demokrattar köşbasşysy Chak Şumer aitty, dep habarlaidy «Adyrna» tılşısı.
«İranda «Tomagavk» zymyrandary joq, Donald Tramp! Ol taǧy da şyndyqqa qaramai, oiyna kelgenın aita beredı. Bız bärımız basşynyŋ ötırık aityp tūrǧanyn bılemız, bıraq mūndai auqymdy mäsele turaly būlai aitu – öreskel qate. Äkımşılıktıŋ basqa bırde-bır ökılı, tıptı Tramptyŋ barlyq aitqanyn qoldaityn Pit Hegset te būl şabuyldy irandyq zymyrandar jasady dep aitqan joq. Tramp eş qysylmastan ötırık aityp otyr»,-dedı Şumer.
Niu-Iork ştatynan sailanǧan demokrat senator būl oqiǧaǧa bailanysty ne bolǧanyn jäne nege sonşa beibıt tūrǧynnyŋ qaza tapqanyn anyqtau üşın tolyq, täuelsız jäne aşyq tergeu jürgızudı talap etetının de mälımdedı.
İrannyŋ oŋtüstıgındegı Minab qalasynda ornalasqan Şadjara Taiiebeh bastauyş mektebıne 28 aqpanda äskeri soqqy jasalǧan. Eldıŋ memlekettık BAQ-tarynyŋ jäne densaulyq saqtau organdarynyŋ mälımetınşe, şabuyl saldarynan 175 adam qaza tapqan, olardyŋ basym bölıgı – balalar.
Būǧan deiın Donald Tramp mektepke jasalǧan şabuylǧa İran jauapty ekenın mälımdegen edı. Ol şabuylǧa «Tomagavk» zymyrandary qoldanylǧany turaly aqparatqa qatysty pıkır bıldırıp, mūndai zymyrandardy kez kelgen el satyp alyp, paidalana alatynyn, sonyŋ ışınde İran da qoldanuy mümkın ekenın aitqan. Al İran bilıgı, kerısınşe, būl soqqy syrttan jasalǧanyn jetkızgen.
Bırqatar sarapşy men amerikalyq AQŞ Aq üi basşysynyŋ mälımdemesıne kümän keltırgen. Clash Report basylymynyŋ mälımetınşe, «Tomagavk» zymyrandary negızınen AQŞ äskeri-teŋız küşterınıŋ qaru-jaraǧyna jatady. Sonymen qatar mūndai zymyrandardyŋ belgılı bır sany tek AQŞ-tyŋ üş odaqtasynda – Ūlybritaniia, Avstraliia jäne Japoniiada ǧana bar ekenı aityldy.
