Foto: podrobno.uz
Özbekstan prezidentı Şavkat Mirziioev pen Resei prezidentı Vladimir Putin Jizaq oblysynda salynatyn atom elektr stansiiasynyŋ (AES) bırınşı energoblogynyŋ qūrylysyna resmi start berdı. Joba Sankt-Peterburgten beinebailanys arqyly bastalyp, oǧan Halyqaralyq atom energiiasy agenttıgınıŋ ökılderı de qatysty, dep habarlaidy "Adyrna".
Jizaq oblysyndaǧy joba erekşe formatymen nazar audartady: bır keşende quaty 1000 MVt bolatyn ekı ırı reaktor jäne 55 MVt bolatyn ekı şaǧyn reaktor salynady. Sarapşylardyŋ aituynşa, mūndai aralas model älemde alǧaş ret jüzege asyp otyr.
Stansiia ıske qosylǧannan keiın jylyna şamamen 17 mlrd kVt·saǧ elektr energiiasyn öndıredı dep kütıledı. Būl Özbekstannyŋ elektr energiiasyna degen sūranysynyŋ şamamen 15 paiyzyn jabuǧa mümkındık beredı.
Özbekstan prezidentı Şavkat Mirziioev jobada qauıpsızdık pen ekologiialyq standarttardyŋ tolyq saqtalatynyn atap öttı. Barlyq jūmystar Halyqaralyq atom energiiasy agenttıgınıŋ talaptaryna sai jäne halyqaralyq baqylaumen jürgızıledı.
«Uzatom» agenttıgınıŋ töraǧasy Azim Ahmedhadjaevtyŋ aituynşa, jobanyŋ bazalyq qūny 9,5 mlrd dollardy qūraidy. Onyŋ 85-90 paiyzy nesie esebınen qarjylandyrylady. Qarjynyŋ bır bölıgı BRİKS qūramyndaǧy Jaŋa damu bankımen kelıssözder arqyly tartyluy mümkın.
Sonymen qatar joba aiasynda jergılıktı öndırıs ülesın 30 paiyzǧa deiın arttyru josparlanǧan. Būl qūrylys şyǧyndaryn azaituǧa jäne ekonomikalyq tiımdılıktı arttyruǧa yqpal etpek.
Joba Jizaq oblysy Fariş audanynda, Tuzkan kölı maŋynda ıske asyrylady. Qūrylysta şamamen 15 myŋ adam jūmys ısteidı dep josparlanǧan.
Aita ketsek, būl AES Qazaqstan-Özbekstan şekarasynan 320 km jerden salynady. Qazır Qazaqstanda alǧaşqy atom elektr stansiiasyn salu jobasy da kezeŋ-kezeŋımen ıske asyrylyp jatyr. Atom energiiasy agenttıgınıŋ mälımetınşe, elde alǧaşqy AES qūrylysynyŋ jalpy qūny şamamen 16,4 mlrd dollardy qūraidy.
