Almaty qalasynyŋ äkımdıgı Olimpiada chempiony Mihail Şaidorovty tūrǧyn üimen qamtamasyz etu jūmystaryn jürgızude, dep habarlaidy "Adyrna" ūlttyq portaly.
Būl maqsatta üş bölmelı päter satyp aluǧa memlekettık satyp alu räsımı ūiymdastyrylǧan.
Qalalyq kommunaldyq infraqūrylym basqarmasynyŋ mälımetınşe, sportşyǧa berıletın baspananyŋ aumaǧy şamamen 110–120 şarşy metr bolady. Päterdı satyp aluǧa jergılıktı biudjetten 120 million teŋge qarastyrylǧan. Äkımdık ökılderı mūndai qoldau halyqaralyq jarystarda el namysyn abyroimen qorǧap, joǧary jetıstıkterge jetken sportşylardy yntalandyru jäne olardyŋ eŋbegın baǧalau maqsatynda körsetıletının atap öttı.
Qazır tūrǧyn üidı satyp alu räsımı aiaqtalǧanymen, päterdıŋ kıltı iesıne älı tapsyrylǧan joq. Mamandar qūjattardy räsımdeu men menşık qūqyǧyn tırkeu jūmystaryn jalǧastyryp jatyr.
Jauapty mekemenıŋ habarlauynşa, barlyq zaŋdyq räsımder aiaqtalǧannan keiın Mihail Şaidorovqa jaŋa baspana resmi türde tabystalady. Jospar boiynşa būl prosess şılde aiynyŋ ortasyna deiın tolyq aiaqtalmaq.
