11–12 şılde künderı Astana qalasyndaǧy Qazanat ippodromy aumaǧynda qazaqtyŋ ūlttyq susyny – qymyzǧa arnalǧan «BaiQymyz – baptalǧan qymyz» halyqaralyq festivalı ötedı. Biyl ekınşı ret ūiymdastyrylatyn auqymdy şaraǧa 70-ten astam qymyz öndıruşı qatysyp, bırneşe tonna qymyz äkelınedı dep kütılude.
Festivaldıŋ basty erekşelıkterınıŋ bırı – qymyz öndıruşıler arasyndaǧy baiqau. Jalpy jülde qory 45 million teŋgenı qūraidy. Al bas jülde jeŋımpazyna avtokölık tabystalady.
«BaiQymyz» gastrofestivalınıŋ avtory Jūmajan Qaltaev "Adyrna" ūlttyq portalyna sūhbat berdı.
Onyŋ aituynşa, festivaldıŋ negızgı maqsaty – qymyz mädenietın därıpteu, ūlttyq qūndylyqtardy nasihattau jäne qymyz öndıruşılerdıŋ käsıbın damytuǧa qoldau körsetu.
Şara barysynda keluşıler qymyzdyŋ san aluan türınen däm tatyp qana qoimai, qazaq halqynyŋ salt-dästürımen, ūlttyq oiyndarymen jäne mädeni mūrasymen tanysa alady. Balalarǧa arnalǧan arnaiy ūlttyq oiyndar ūiymdastyrylyp, zeinetkerler men balalar üşın kıru tegın bolady.
Ūiymdastyruşylar festivalge keluşılerdıŋ qymyzdy tegın tatyp köruıne mümkındık jasalatynyn atap öttı. Sonymen qatar şara aiasynda kıtap körmesı de ötedı.
Jūmajan Qaltaevtyŋ pıkırınşe, älem jylqyny alǧaş qolǧa üiretkenderdıŋ bırı retınde Botai mädenietın moiyndaǧanymen, qazaq halqy öz ūlttyq mūrasynyŋ qūndylyǧyn tolyq sezıne bermeidı. Sondyqtan festival ūlttyq susynnyŋ qadır-qasietın tanytyp, jastardyŋ tarihi tamyryna degen qyzyǧuşylyǧyn arttyruǧa baǧyttalǧan.
