11–12 شىلدە كۇندەرى استانا قالاسىنداعى قازانات يپپودرومى اۋماعىندا قازاقتىڭ ۇلتتىق سۋسىنى – قىمىزعا ارنالعان «BaiQymyz – باپتالعان قىمىز» حالىقارالىق فەستيۆالى وتەدى. بيىل ەكىنشى رەت ۇيىمداستىرىلاتىن اۋقىمدى شاراعا 70-تەن استام قىمىز ءوندىرۋشى قاتىسىپ، بىرنەشە توننا قىمىز اكەلىنەدى دەپ كۇتىلۋدە.
فەستيۆالدىڭ باستى ەرەكشەلىكتەرىنىڭ ءبىرى – قىمىز وندىرۋشىلەر اراسىنداعى بايقاۋ. جالپى جۇلدە قورى 45 ميلليون تەڭگەنى قۇرايدى. ال باس جۇلدە جەڭىمپازىنا اۆتوكولىك تابىستالادى.
«BaiQymyz» گاستروفەستيۆالىنىڭ اۆتورى جۇماجان قالتاەۆ "ادىرنا" ۇلتتىق پورتالىنا سۇحبات بەردى.
ونىڭ ايتۋىنشا، فەستيۆالدىڭ نەگىزگى ماقساتى – قىمىز مادەنيەتىن دارىپتەۋ، ۇلتتىق قۇندىلىقتاردى ناسيحاتتاۋ جانە قىمىز وندىرۋشىلەردىڭ كاسىبىن دامىتۋعا قولداۋ كورسەتۋ.
شارا بارىسىندا كەلۋشىلەر قىمىزدىڭ سان الۋان تۇرىنەن ءدام تاتىپ قانا قويماي، قازاق حالقىنىڭ سالت-داستۇرىمەن، ۇلتتىق ويىندارىمەن جانە مادەني مۇراسىمەن تانىسا الادى. بالالارعا ارنالعان ارنايى ۇلتتىق ويىندار ۇيىمداستىرىلىپ، زەينەتكەرلەر مەن بالالار ءۇشىن كىرۋ تەگىن بولادى.
ۇيىمداستىرۋشىلار فەستيۆالگە كەلۋشىلەردىڭ قىمىزدى تەگىن تاتىپ كورۋىنە مۇمكىندىك جاسالاتىنىن اتاپ ءوتتى. سونىمەن قاتار شارا اياسىندا كىتاپ كورمەسى دە وتەدى.
جۇماجان قالتاەۆتىڭ پىكىرىنشە، الەم جىلقىنى العاش قولعا ۇيرەتكەندەردىڭ ءبىرى رەتىندە بوتاي مادەنيەتىن مويىنداعانىمەن، قازاق حالقى ءوز ۇلتتىق مۇراسىنىڭ قۇندىلىعىن تولىق سەزىنە بەرمەيدى. سوندىقتان فەستيۆال ۇلتتىق سۋسىننىڭ قادىر-قاسيەتىن تانىتىپ، جاستاردىڭ تاريحي تامىرىنا دەگەن قىزىعۋشىلىعىن ارتتىرۋعا باعىتتالعان.
