Ūlytau oblysynda ötken «Ulytau Invest–2026» Qazaqstan–Qytai investisiialyq forumy aiasynda jalpy qūny 368,6 million AQŞ dollaryn qūraityn investisiialyq memorandumdarǧa qol qoiyldy.
Qūjattar tūrǧyn üi qoryn jäne qalalyq infraqūrylymdy jaŋǧyrtuǧa, önerkäsıptı damytuǧa, şahtalardaǧy öndırıstık qauıpsızdıktı küşeituge, tömen kömırtektı industriialyq klaster qalyptastyruǧa jäne öŋırde jel elektr stansiialaryn saluǧa baǧyttalǧan bırqatar investisiialyq jobalardy ıske asyrudy közdeidı.
Forum Qazaqstan men Qytaidyŋ memlekettık organdary, biznes jäne investisiialyq qauymdastyqtarynyŋ ökılderın bır alaŋǧa jinady. Auqymdy ıs-şaraǧa Qytaidyŋ 20-dan astam ırı kompaniiasynyŋ delegasiialary qatysty.
Is-şaraǧa deiın Ūlytau oblysynyŋ äkımı Dastan Ryspekov Şensi provinsiiasynan kelgen delegasiia basşysy Van Szinszinmen ekıjaqty kezdesu ötkızıp, sauda-ekonomikalyq yntymaqtastyqty keŋeitu jäne jaŋa investisiialyq jobalardy jüzege asyru mäselelerın talqylady.
«Ulytau Invest–2026» forumy barysynda oblystyŋ tau-ken metallurgiiasy, öŋdeu önerkäsıbı, agroönerkäsıp, energetika, logistika jäne infraqūrylym salalaryndaǧy investisiialyq mümkındıkterı tanystyryldy. Sondai-aq Qazaqstan men Qytai käsıpkerlerı arasynda B2B jäne G2B formatyndaǧy kezdesuler ūiymdastyrylyp, jaŋa jobalardy bırlesıp ıske asyru jäne ärıptestıktı keŋeitu baǧyttary qarastyryldy.
Is-şarada söz söilegen Ūlytau oblysynyŋ äkımı Dastan Ryspekov halyqaralyq yntymaqtastyq pen investisiia tartu öŋır damuynyŋ negızgı basymdyqtarynyŋ bırı ekenın atap öttı. Onyŋ aituynşa, forum būǧan deiın oblys delegasiiasynyŋ Qytaidyŋ Sian qalasyna jūmys sapary barysynda qol jetkızılgen kelısımderdıŋ naqty jalǧasy boldy.
Forumnyŋ resmi bölıgınen keiın Qytai delegasiiasynyŋ ökılderı öŋırdegı investisiialyq alaŋdar men öndırıstık käsıporyndardy aralap, ıske asyrylyp jatqan jäne bolaşaq investisiialyq jobalarmen tanysty.
