Bügın, 22 şıldede Premer-ministrdıŋ orynbasary – Mädeniet jäne aqparat ministrı Aida Balaeva Qazaqstanda mäiıttık donorlyqty damytudyŋ maŋyzdylyǧy turaly pıkır bıldırdı, dep habarlaidy “Adyrna”.
Qazaqstandyqtarǧa ündeu jasaǧan vise-premer adamnyŋ ömırı – tabiǧattyŋ qaitalanbas syiy ärı eşnärsemen ölşenbeitın eŋ joǧary qūndylyq ekenın atap öttı.
“Adam ömırı – tabiǧattyŋ bıregei syiy ärı älemdegı eşbır düniemen ölşenbeitın eŋ joǧary qūndylyq. Būl memleketpen de, qoǧammen de, zaŋmen de, dınmen de moiyndalǧan şyndyq. Ärine, būl barşamyzǧa ortaq, tüsınıktı oi. Bıraq, künı keşe "Habar" arnasy tüsırgen "4739" derektı filmın körıp otyryp, osy aqiqattyŋ qanşalyqty tereŋ, qaşnalyqty maŋyzdy ekenıne taǧy bır ret köz jetkızgendeimın. Söz joq, būl film bızdıŋ adam ömırın saqtaudaǧy tehnologiialyq mümkındıkterge ǧana emes, eŋ aldymen är adamǧa tän ümıt pen ömırge qūştarlyq, jürek jylatar ökınış pen quanyş, ruhani küres siiaqty ülken sezımderge közımızdı qaita aşqandai”, – dedı Aida Balaeva.
Balaevanyŋ sözınşe, osy künı elımızde 4739 adam transplantasiia kezegınde tūr.
“Būl degenıŋız 4739 ükılı ümıt, eljıregen jürek, jaltaqtaǧan janar. Olardyŋ arasynda 125 bala bar”, – dedı Aida Balaeva.
Qazaqstanda transplantasiialardyŋ şamamen 90 paiyzy tırı tuystyq donorlardyŋ qatysuymen jasalady. Al qaitys bolǧannan keiıngı donorlyqtyŋ ülesı 10 paiyzǧa da jetpeidı.
Vise-premer mäiıttık donorlyqqa kelısım bergenın aitty.
“Al endı menıŋ öz basyma kelsem… Künderdıŋ künınde jaqyndarymnyŋ aldyna däl osyndai taŋdau tūrsa, onda, söz joq, ömırge qaita oralǧysy keletın adamdarǧa kömektesudıŋ maŋyzyn tüsıngenın qalar edım. Men aǧzalarymdy donorlyqqa beruge kelısım beretınımdı jauapkerşılıkpen atap ötkım keledı. Sebebı bır adamnyŋ şeşımı basqa bır adamǧa ömır süruge mümkındık beruı mümkın.
Adam ömırınen qymbat eşteŋe joq. Al ony saqtap qaluǧa baǧyttalǧan ärbır ızgı qadamnyŋ maŋyzy zor. Transplantasiiaǧa mūqtaj är adamnyŋ artynda ömırge degen ülken ümıt tūr. Sol ümıttı üzbeu – barşamyzǧa ortaq adamgerşılık mındet dep oilaimyn.”, – dedı Balaeva
Derektı filmdı 24 şılde künı saǧat 19:30-da 24KZ telearnasynan köruge bolady.
2026 jylǧy 13 şıldede Qazaqstanda alǧaş ret qan donorlaryna arnalǧan "Qūrmettı donor" tösbelgısı taǧaiyndalǧany belgılı boldy. Densaulyq saqtau ministrlıgınıŋ mälımetınşe, jaŋa marapattyŋ alǧaşqy iegerlerı bekıtılgen talaptarǧa tolyq säikes keletın 481 tūraqty donor bolady.
