Qazaqstan mūnaiynyŋ basym bölıgı eksporttalatyn Kaspii qūbyr konsorsiumy arqyly mūnai tieu jūmystary qaitadan üzılıspen jürgızılıp jatyr, dep habarlaidy "Adyrna" tılşısı Reuters-ke sıltep.
Būǧan Qara teŋızdegı terminal maŋynda ūşqyşsyz ūşu apparattarynyŋ şabuyldary men tankerlerdıŋ jetıspeuı sebep bolǧan.
Agenttık mälımetınşe, soŋǧy täulıkte KQK terminalynyŋ jūmysy ekı ret toqtap, keiın qaita jalǧasqan. Alaida 5 tamyz künı taŋerteŋ mūnai tieu taǧy da uaqytşa toqtatyldy. Beiresmi derekközderdıŋ aituynşa, mūnai jöneltu kestesı kün saiyn özgerıp jatyr. Keibır partiialar josparǧa engızılgenımen, tanker tabylmaǧandyqtan uaqytynda jöneltılmeidı. Jaǧdaidyŋ qiyndauyna köptegen keme kompaniialarynyŋ qauıpsızdıkke bailanysty tankerlerın Qara teŋızge jıberuden bas tartuy äser etıp otyr.
Sarapşylardyŋ aituynşa, būl jaǧdai mūnai baǧasyna da yqpal etken. Qazaqstannyŋ CPC Blend markaly mūnaiy būryn Brent baǧasynan qymbat satylsa, qazır kerısınşe arzandap ketken. Būǧan jetkızu merzımınıŋ keşıguı men tasymal qūnynyŋ qymbattauy sebep.
Qazır Qazaqstan eksporttaityn mūnaidyŋ 80 paiyzdan astamy KQK arqyly tasymaldanady. Būl qūbyrmen Teŋız, Qaşaǧan jäne Qaraşyǧanaq ken oryndarynyŋ mūnaiy älemdık naryqqa şyǧarylady. Balama baǧyttar bolǧanymen, olardyŋ ötkızu mümkındıgı şekteulı.
Būǧan deiın energetika ministrlıgı KQK jūmysy tolyq toqtamaitynyn habarlaǧan. Alaida şılde aiynda oryn alǧan qiyndyqtar saldarynan Qazaqstandaǧy mūnai öndırısı mausym aiymen salystyrǧanda şamamen 14 paiyzǧa azaidy. Osyǧan bailanysty «Teŋızşevroil» kompaniiasy tamyz aiynda mūnaidyŋ bır bölıgın temırjol arqyly Gruziianyŋ Batumi portyna jetkızudı josparlap otyr.
