Sailaualdy nauqan aiasynda saiasi partiialar bılım beru, eŋbek naryǧy, ekologiia jäne öŋırlık damu mäselelerı boiynşa ūsynystaryn tanystyrdy. Tiıstı bastamalar televiziialyq debat barysynda jäne sailauşylarmen ötken kezdesude köterıldı.
Sailaualdy nauqan aiasyndaǧy partiialardyŋ qyzmetı
«Ädılet» partiiasynyŋ ökılderı men Qūryltai deputattyǧyna ümıtkerlerı Qyzylorda oblysy jūrtşylyǧymen kezdesu ötkızdı. Basqosuǧa energetika, auyl şaruaşylyǧy, käsıpkerlık, bılım beru, öner jäne mädeniet salalarynyŋ ökılderı qatysty.
JSDP ökılderı Aqmola jäne Qaraǧandy oblystarynda sailauşylarmen kezdestı. Kökşetauda №19 orta mekteptıŋ pedagogikalyq ūjymymen ötken kezdesude bılım beru jüiesın damytu, mūǧalımderdıŋ eŋbek jaǧdaiy, mektepterdı kadrmen qamtamasyz etu, bılım salasy qyzmetkerlerın äleumettık qoldau jäne bılım beru infraqūrylymyn jetıldıru mäselesı talqylandy.
«Baitaq» partiiasynyŋ ökılderı Jambyl, Aqtöbe jäne Maŋǧystau oblysynda, sondai-aq Almaty qalasynda bırqatar ıs-şara ötkızdı. Tūrǧyndarmen, jastarmen jäne eŋbek ūjymdarymen kezdesude ekologiia, qaldyqtardy basqaru, aua sapasy, tabiǧi resurstardy paidalanu, kommunaldyq infraqūrylymdy damytu, eldı mekenderdı abattandyru jäne qalanyŋ jai-küiı söz boldy. Kezdesulerdıŋ bırınde sailaualdy nauqandy ötkızu, halyqaralyq baiqau jäne sailau prosesın ūiymdastyru mäselesı de talqylandy.
Qazaqstannyŋ Halyq partiiasynyŋ ökılderı Atyrau oblysyndaǧy Karabatan Utility Solutions LLC, Ūlytau oblysyndaǧy «Maral Nūr» JŞS, Türkıstandaǧy Southern Light Transit institutynyŋ eŋbek ūjymdarymen, sondai-aq «Jansaia» äleumettık ortalyǧynyŋ qyzmetkerlerımen kezdestı. Kezdesu barysynda äleumettık-ekonomikalyq damu, jūmyspen qamtu, halyqty äleumettık qoldau, bılım beru, densaulyq saqtau, äleumettık sala, tūrǧyn üi saiasaty, eŋbek jaǧdaiy jäne öŋırlık damu mäselesı köterıldı.
Pavlodarda käsıpodaq belsendılerımen ötken kezdesude Qūryltai deputattyǧyna ümıtker Evgenii Mironov JSDP-nyŋ käsıpodaqtardyŋ eŋbek qūqyqtaryn qorǧaudaǧy rölıne qatysty bastamasyna syn aitty. Onyŋ pıkırınşe, eŋbek dauy kelıssözder, sot talqylauy jäne eŋbek törelıgı arqyly şeşıluı tiıs.
«Auyl» partiiasynyŋ ökılderı «Esıl Su» filialynyŋ ūjymymen kezdesıp, sumen jabdyqtau, injenerlık infraqūrylymdy jaŋǧyrtu, su resurstaryn paidalanu jäne kommunaldyq salany damytu mäselesın talqylady.
«Aq jol» demokratiialyq partiiasynyŋ ökılderı Jezqazǧan qalasynda, sondai-aq Ūlytau, Maŋǧystau, Türkıstan jäne Qaraǧandy oblysynda sailauşylarmen kezdestı. Sonymen qatar Eŋbekşıqazaq köpsalaly audandyq auruhanasynyŋ medisina qyzmetkerlerımen jeke kezdesu öttı.
Partiia ökılı Bek-Mūhamed Jaukebaev Respublica partiiasynyŋ baǧdarlamasy men kandidattar tızımıne qatysty syn pıkır bıldırıp, onyŋ salyq saiasaty men şaǧyn jäne orta biznestı qoldau jönındegı ūstanymy jetkılıktı deŋgeide naqtylanbaǧanyn aitty. Būǧan deiın «Aq jol» partiiasy da Salyq kodeksınıŋ käsıpkerlıkke qolaisyz dep sanaityn jekelegen normalaryna qatysty öz synyn bıldırgen bolatyn.
Respublica partiiasynyŋ ökılderı Jambyl oblysyndaǧy «Zapchast» AQ, Taraz metallurgiia zauyty jäne «Alel Agro» JŞS qyzmetkerlerımen kezdestı. Kezdesude mındettı äleumettık medisinalyq saqtandyru, zeinetaqymen qamsyzdandyru, önerkäsıptı damytu, otandyq öndıruşılerdı qoldau, elektr energiiasynyŋ tarifterı, temırjol logistikasy, önım ötkızu, eksport, importty almastyru jäne salyq saiasaty mäselesı qaraldy.
Sonymen qatar Tarazda partiia ökılderınıŋ qatysuymen forum ötıp, onda öŋırlık damu, äleumettık infraqūrylym, turizm, inkliuziia jäne Şaqpaq-Baba asuynda tonnel salu mäselelerı talqylandy.
Teledebat: bılım, eŋbek jäne damu mäselelerı boiynşa partiialardyŋ ūsynysy
«Ädılet» partiiasynyŋ ökılı Rauan Kenjehanūly OpenAI kompaniiasymen bırlesken bastama aiasynda Qazaqstandaǧy 160 myŋ mūǧalımnıŋ ChatGPT Edu bılım beru servisıne tegın qol jetkızgenın mälımdedı. Onyŋ aituynşa, servis oqu josparyn, esepter men basqa da jūmys materialdaryn äzırleuge, sondai-aq bılım beru salasyn basqarudaǧy taldau jūmystaryna paidalanyluy mümkın.
Sondai-aq debat barysynda ol ǧylym men ekonomikanyŋ özara bailanysyna toqtalyp, joǧary oqu oryndarynda tehnologiialar transfertınıŋ tetıkterın damytudyŋ maŋyzyn atap öttı. Onyŋ aituynşa, būl bastama ǧylym men ekonomikanyŋ yqpaldastyǧyn küşeituge baǧyttalǧan.
JSDP ökılı Maqsūt Nasibulov Qazaqstanda joǧary bılımnıŋ qoljetımdılıgı mäselesıne toqtaldy. Onyŋ aituynşa, mūndai model bırqatar damyǧan elderde qoldanylady. Debat barysynda moderator ūsynǧan bastamada ony ıske asyrudyŋ merzımı, qūny jäne naqty tetıkterı körsetılmegenıne nazar audardy. Sondai-aq Maqsūt Nasibulov joǧary bılımnıŋ qoljetımdılıgıne qatysty partiianyŋ ūstanymyn tanystyrdy.
Būdan bölek, ol mekteptegı bılım sapasy mäselesın köterıp, bılımdı baǧalau täsılderın jetıldırudıŋ jäne joǧary synyp oquşylary üşın beiındık oqytu mümkındıkterın keŋeitudıŋ maŋyzyn atap öttı.
«Baitaq» Qazaqstan jasyldar partiiasynyŋ ökılı Aslan Baizahanov äleumettık jelıler arqyly tüsken körermen saualyna jauap bere otyryp, ekologiialyq üderısterdı zertteude, qorşaǧan ortanyŋ jai-küiın baǧalauda jäne ekologiialyq derekterdı taldauda matematikalyq taldau men esepteulerdıŋ qoldanyluy turaly aitty.
«Auyl» partiiasynyŋ ökılı Şahmardan Baimanov auyldy jerlerge jas mamandardy tartuǧa qatysty ūsynysyn jariialady. Onyŋ aituynşa, bastama auyldyq grantpen bılım alǧan tülekterdı özderın oquǧa jıbergen eldı mekenderge jūmysqa ornalastyrudy közdeidı. Sonymen qatar ol qoldanystaǧy baǧdarlamalar aiasynda jas mamandarǧa köterme järdemaqy men jeŋıldetılgen tūrǧyn üi nesielerı berıletının atap öttı.
«Aq jol» partiiasynyŋ ökılı Dulat Tästekei Qūryltai jūmysy men bılım beru salasyna qatysty ūsynystaryn tanystyrdy. Ol sözınde biudjet qarajatynyŋ jūmsaluyna parlamenttık baqylaudy küşeitu, pedagogterdıŋ eŋbekaqysyn arttyru jäne ǧylymi-innovasiialyq jobalardy qoldau mäselelerıne toqtalyp, būl baǧyttyŋ bılım men ǧylymdy damytudaǧy maŋyzyn atap öttı.
Respublica partiiasynyŋ ökılı Meiramgül Mädälı jasandy intellektınıŋ damuyna bailanysty Mamandyqtar atlasyn tūraqty türde jaŋartyp otyrudyŋ maŋyzyn aitty. Onyŋ sözınşe, būl özgerıster 562 mamandyqqa äser etuı mümkın, al olardyŋ bır bölıgı uaqyt öte kele sūranystan şyǧuy yqtimal.
Ūsynylǧan bastamalardyŋ qatarynda ekonomika qajettılıkterın, jūmys beruşılerdıŋ sūranysyn jäne tülekterdı jūmyspen qamtu mümkındıkterın eskere otyryp, jasandy intellektke qatysty jaŋa baǧyttardy engızu mäselesı de köterıldı.
Sondai-aq debat barysynda partiia ökılderı öŋırlerdegı bılım beru jüiesın damytu, auyl mūǧalımderın qoldau, mektep pen balabaqşa qūrylysyna investisiia tartu, IT baǧytyn, jasandy intellektını jäne ǧylymnyŋ öndırıspen bailanysyn damytu jönındegı ūsynystaryn aitty.
