Jetısu oblysynyŋ Alaköl audanynda qol jetuı qiyn tauly aimaqta tūtanǧan qūrǧaq şöp örtımen küres jalǧasyp jatyr, dep habarlaidy “Adyrna” tılşısı.
Tötenşe jaǧdailar ministrlıgı habarlauynşa, örttı söndıruge kei uchaskelerdıŋ qoljetımsızdıgı kedergı keltırude.
Örttı söndıruge TJM, orman şaruaşylyǧy jäne jergılıktı atqaruşy organdardan 52 adam men 11 tehnika jūmyldyrylǧan. Tauly aimaqta ŪQK Şekara qyzmetınıŋ aviasiiasy jäne TJM-nıŋ «Qazäueqūtqaru» qyzmetı de jūmys ıstep jatyr.
Äueden ört aumaǧyna jalpy kölemı 33 tonna bolatyn 11 ret su tögılgen.
TJM mälımetınşe, eldı mekenderge qauıp tönıp tūrǧan joq. Jaǧdai vedomstvonyŋ baqylauynda.
Būǧan deiın Qaraǧandy oblysynyŋ Şet, Aqtoǧai, Būqar jyrau jäne Qarqaraly audandarynda da dala örtterı tırkelgen. Olardy oqşaulau jäne eldı mekenderdı qorǧau jūmystaryna 620 qyzmetker men 134 tehnika tartylǧan.
