2012-2013 jyldary äke-şeşem bırınen soŋ bırı ömırımen qoştasty. Qandai auyr soqqy bolǧanyn ışterıŋız sezetın bolar. Odan özge de janǧa salmaq tüsırgen mäseleler boldy. Saldarynan özımnıŋ de densaulyǧym syr bere bastady. Qan qysymym köterılıp, sol jaq bölıgım jansyzdana bastady. Sudorog ūstap, qalşyldap jatyp qalatyn kezderım de jiılep kettı. Ondai kezde äne-mıne ömırmen qoştasatyn bolarmyn degen sanany ürei bilep alatyn. Jürek därıgerıne baramyn, neşe türlı aparatpen tekseredı, qaita-qaita qabyldauǧa jazylamyn, bärıbır dym tappaidy. Nevropotogqa joldaidy, olar dym anyqtai almaidy. “Jürek dūrys, tek salmaq tüsken siiaqty” deidı. Türlı vitaminder, jaǧdaidy jeŋıldetetın därılerdı şamalap, topşylap jazyp beredı. Äsırese, qan-tamyrlardy keŋıtetın kapelnisanyŋ paidasy bolǧandai. Bıraq, ol da uaqytşa ǧana jeŋıldık beredı. 2016 jyldyŋ aiaq kezınde üşınşı qyzym Tūmar oinap jürıp oqystan qūlap aiaǧyn syndyryp aldy. Joldasym törtınşı balamyzdy ömırge äkelgenıne bır ai da bolmaǧan kezı edı, aiaǧyn syndyryp alǧan qyzymmen bırge özım auruhanaǧa jattym. Ol kezde deneme äldene tise de, aua jūta almai tynysym tarylyp qalatyn. Balam tünde qorqyp jylaidy, äkesın qūşaqtap ūiqtaǧysy keledı. Al men bolsa, tynysym tarylyp, aua jūta almai qinalyp şyǧamyn. Şydai almai bas därıgerge baryp, qan-tamyrlardaǧy qannyŋ jürısın jaqsartatyn därı (kapelnisa) alyp qabyldauǧa rūqsat sūradym. Ärine, rūqsat bermedı. Aq samaily jasy ülken er kısı, travmatolog balalar därıgerı menıŋ qūjattarymdy qarap, aitqanym boiynşa auru belgılerın qarap şyǧyp, üş jyl boiy bosqa sandalyp jürgen dertımdı naqty atap berdı. İnsult aldyndaǧy (oǧan jetpegenıne şükır) nevrologiialyq mäsele eken. Qaida emdelu kerektıgımdı de baǧyttap jıberdı. “Qalqaman” jaqtaǧy auruhananyŋ aqyly nevrologiia bölımı. Sol jaqqa baryp, tūtas aqyly tekserısten ötıp, 3 jyl anyqtai almai jürgen dertımdı 3 kündı naqty bılıp şyqtym. Moiyn jūlyndary qisaiyp, miǧa dūrys qan, ottegı jetkızbeidı eken. “Protuziia” deidı. “Qoryqpa, üreilengen saiyn auru asqynady, būdan adam ölmeidı” dedı. Qorqynyşym seiıldı. Jūlyn-jüike jattyǧularyn körsetıp berdı.
Bır apta em-domnan keiın bır jyl bassein men iogaǧa baryp, üide, tabiǧatta jattyǧu jasap jürıp jaqsy bolyp kettım. Psihologiialyq, motivasiialyq kıtaptardyŋ da paidasy tidı. Ömırdı basqaşa dünietanymmen qaita bastadym dese de bolady. Būl künde öz ışkı jan-düniemde rettılık, üilesımdılık jüiesın qalyptastyruǧa tyrysamyn. Mülde därıgerge barudy qoiyp kettım. 5 jyldan asty. Būl endı bölek taqyryp.
Negızgı aitpaǧym, köpşılık därıgerler dūrys diagnoz qoia almai sandaltady. Almatyda jaǧdai osylai bolsa, basqa aimaqtar turaly mülde sözımız joq. Älde em alyp bastaǧanǧa deiın de konsultasiia arqyly molyraq aqşa tauyp qaludy közdei me? Älde şynymen bılıktılıgı jetpei me? Nege adam ömırıne nemqūraily qaraudy ädetke ainaldyrǧan? Qarap otyrsaq, osydan bırneşe jyl būrynǧy jaǧdai eş özgermeptı.
Ūqsas jaŋalyqtar
