Bügın Qazaqstan Respublikasynyŋ Prezidenttıgıne kandidat Jiguli Dairabaev Arşaly audany Anar auylyndaǧy sailauşylarymen kezdestı. Atalǧan eldımekendegı «Aian» JŞS tynys-tırşılıgımen tanysty. Kezdesude kandidat jūrtşylyqty özınıŋ sailaualdy baǧdarlamasynyŋ negızgı baǧyttarymen tanystyrdy.
Anar stansiiasynda ornalasqan käsıporyn – «Aian» JŞS ūn tartumen, ūn, makaron önımderın öndırumen ainalysady. Astana maŋynda paida bolǧan alǧaşqy otandyq käsıporyndardyŋ bırı. Elordanyŋ azyq-tülık beldeuıne engen. Käsıporyn tūraqty jūmys ısteidı, alaida soŋǧy kezdegı astyq baǧasynyŋ kürt ösuıne bailanysty belgılı bır qiyndyqtar tuyndaǧan. Kompaniianyŋ öz alqabynan alǧan bırşama şikızaty bar. Bıraq ol mäselenı şeşpeidı.
«Būl tūrǧydan kelgende mūndai käsıporyndar naryqta arzan şikızat ızdep alasūrmai, şikızat jetkızuşılerın naqty anyqtap, ainalasynda ornalasqan tauar öndıruşılermen ekı jaqqa da qolaily baǧamen ūzaq merzımdı perspektivada jūmys ısteuı kerek.
Biyl köktemde fermerlerden astyq jetkızude daǧdarys boldy. Fermerler men öŋdeuşıler baǧa boiynşa kelıse almady. Fermerler astyqtyŋ tonnasyn naryqtaǧy baǧa – 180 myŋ teŋgeden saudalady, al ūn tartuşylardyŋ bergen baǧasy 120 myŋ teŋge boldy. Būl 120 myŋ teŋge reseilık kontrabandalyq astyq baǧasy edı. Şeneunıkter mäselenı şeşudıŋ ornyna astyq eksportyna tyiym salyp, sol arqyly fermerler müddesın aiaqasty ettı. Barlyǧyn naryqtyq, ekonomikalyq ädıster – subsidiialardyŋ eluge juyq türın onyŋ bır-ekı türımen almastyra otyryp, fermerler öndırgen auyl şaruaşylyǧy önımderı qūnyn subsidiialaudy engızuge mümkındık bolsa da olar basqa eşteŋe oilap tappady.
Naryqta 180 myŋ teŋge tūratyn astyq qūnynyŋ 40% fermerlerge subsidiia retınde berılıp, ūn tartuşylarǧa astyq 108 myŋ teŋgeden satylǧanda tarazy basy teŋ bolar edı. Sondai-aq, öŋdeu käsıporyndary nesielerınıŋ paiyzdyq mölşerlemesın subsidiialap, olarǧa fermerlerden auylşaruaşylyq önımderın arzan nesielermen satyp alatyn jaǧdai jasauǧa bolady. Sonda fermerlerdıŋ de, ūn tartuşylardyŋ da, eŋ bastysy, ūn men nan tūtynuşylardyŋ, iaǧni Qazaqstannyŋ barlyq azamatynyŋ müddesı qorǧalady.
Bız eksportqa baǧdarlanǧan elmız, sol sebeptı astyq baǧasyn tūraqtandyru maqsatynda eksportty jabuǧa bolmaidy. Sonymen qatar memleket tarapynan barynşa qoldau körsetılıp, şikızat satyp alu baǧasyndaǧy aiyrmaşylyq öteluı tiıs. Öŋdeu käsıporyndaryna şikızatty kez kelgen uaqytta qajetınşe satyp alatyndai jaǧdai jasalynu kerek jäne būl ūn men makaron önımderınıŋ soŋǧy baǧasyna äser etpeuı tiıs», – dedı Kandidat Jiguli Dairabaev.
Odan keiın kandidat Anar auylynyŋ tūrǧyndarymen kezdestı. Jiynǧa auyldyŋ 70-tei tūrǧyny, atalǧan eldımekennıŋ azamattyq qoǧamynyŋ ökılderı qatysty. Olar kandidat baǧdarlamasyna qyzyǧuşylyq tanytyp, qyzu qoldau bıldırdı. Sailauşylarǧa kooperativter, tūtynu kooperativterın qūru mäselesı öte ūnady. Sebebı auyl elordaǧa jaqyn ornalasqandyqtan et, süt jäne basqa da auylşaruaşylyq önımderın öndırumen ainalysatyn ärbır üi şaruaşylyǧy öz önımın astana naryǧyna şyǧaryp satuǧa müddelı. Osyǧan orai, jiynǧa qatysuşylardyŋ basym bölıgı kooperasiianyŋ maŋyzdylyǧyna toqtalyp, kandidattan osy baǧytta naqty şaralar qabyldaudy kütetının aitty. Tūrǧyndar kandidatqa saiasi tartysta tabys tıledı.
