Memleket basshysynyń tapsyrmasyna sáıkes 2025 jyldyń sońyna deıin Kerbulaqtan Taldyqorǵanǵa deıin barlyq eldi mekender gazben qamtylady
Memleket basshysy Qasym Jomart Toqaev Jetisý óńirine jumys sapary barysynda óńirdiń sý men gaz máselesine erekshe nazar aýdarǵan bolatyn. 2025 jyldyń sońyna deıin Kerbulaq aýdanynan Taldyqorǵan qalasyna deıingi barlyq eldi mekender, al 2028 jylǵa deıin Aqsý, Sarqan, Alakól aýdandaryn tabıǵı gazben qamtamasyz etý tapsyryldy. Osy jobalardy iske asyrý nátıjesinde óńirdi gazdandyrý 100% nemese 192 eldi mekenge deıin jetedi. Búgingi kúni bul jumys qolǵa alynyp, tıisti sharalar júzege asyrylýda. Osy jáne oblys turǵyndaryn qatty otynmen qamtamasyz etý, sýmen jabdyqtaý máseleleri jaıynda oblystyq energetıka jáne turǵyn úı kommýnaldyq sharýashylyq basqarmasynyń basshysy Ernat Bázil óńirlik kommýnıkaııalar alańynda ótken brıfıngte baıandady.
«Óńirde gaz berý jumystary da belsendi júrgizilýde. Búgingi kúnniń ózinde júrgizilgen jumystar nátıjesinde Kóksý aýdanynyń Muqry, Besqaınar, Amangeldi aýyldary, Eskeldi aýdanynyń Orkýsak aýyly, Taldyqorǵan qalasynyń Prıgorodnoe shaǵyn aýdany, 3 bólimshesiniń turǵyndary, jalpy eseppen 6 myńnan astam turǵyn tabıǵı gazǵa qol jetkizdi.
Qazirgi ýaqytta Eskeldi, Kóksý, Kerbulaq, Qaratal aýdandaryn tolyq gazdandyrý úshin 43 eldi meken boıynsha jobalaý-izdestirý jumystaryna esep jasalyp, qarajat bólý úshin bıýdjettik ótinim berildi. Qurylys-montajdaý jumystary 2025 jylǵa deıin júzege asyrylady. Al, Aqsý, Sarqan jáne Alakól aýdandarynyń eldi mekenderin gazdandyrý úshin «Qapal», «Jansúgirov», «Sarqan», «Qoılyq», «Qabanbaı» jáne «Úsharal» gaz tasymaldaý stansasy men «Taldyqorǵan-Úsharal» magıstraldyq gaz qubyrynyń qurylysy» jobalyq-smetalyq qujattamasy ázirlenýde», - deıdi Ernat Dúısenbekuly.
«Jylytý maýsymyna kelsek, bul baǵyttaǵy jumystar shtattyq rejımde júrgizilýde. Búgingi kúni qoımalar men tuıyqtarda 14,4 myń tonna kómir qory bar. Kómir jetkizý bizdiń tarapymyzdan turaqty baqylaýda, táýligine orta eseppen 27 vagon kelip túsýde. Baǵasyna kelsek, bir tonna kómirdiń quny 14 800 – 15 500 teńgeni quraıdy» - deıdi spıker.
Óńir turǵyndarynyń taǵy bir ózekti máselesiniń biri – sý. Búgingi kúni oblystyń 90,2% eldi mekeni ortalyqtandyrylǵan sýmen qamtamasyz etilgen. Memleket basshysynyń tapsyrmasyna sáıkes 2025 jyly oblystyń barlyq eldi mekenderin 100 paıyz aýyz sýmen qamtý josparlanǵan.
Bıyl «Tekeli qalasynda qoldanystaǵy uńǵymalardan sýmen jabdyqtaý ınjenerlik jelileriniń qurylysyn júrgizý» jobasy iske asyrylýda. Jobaǵa 2022 jylǵa jergilikti bıýdjetten 100 mln. teńge bólindi.
