Aty ańyzǵa aınalǵan áıgili fýtbolshy Pele 82 jasynda qaıtys boldy. Bul týraly onyń qyzy Kellı Nasımentý ınstagram paraqshasynda habarlady, dep jazady "Adyrna" ulttyq portaly.
"Bizde bardyń bári sizdiń arqańyzda. Biz seni sheksiz jaqsy kóremiz. Jatqan jerińiz jaıly bolsyn", – dep jazdy qyzy.
Fýtbolshynyń qaıtys bolǵanyn onyń agenti Djo Fraga da rastady.
Pele - álemdik fýtbol tarıhynda úsh ret álem chempıony atanǵan jalǵyz sportshy (1958, 1962, 1970). Ol 92 matchta 77 gol soqty. Kásibı mansabynda Pele 1 281 gol soǵyp, Gınnestiń rekordtar kitabyna engen.
Esterińizde sala keteıik, Peleniń 2021 jyldyń tamyzynda toq ishek qaterli isigine shaldyqqany anyqtalyp, ony aýrýhanaǵa jatqyzǵan. Qyrkúıekte fýtbolshyǵa shuǵyl túrde kúrdeli ota jasaldy, alaıda dárigerler oǵan hımıoterapııa kómektespeı jatqanyn habarlaǵan edi. 26 jeltoqsanda Peleniń otbasymen qoshtasa bastaǵany týraly aqparat barlyq BAQ kózderinde taraǵan.
"Adyrna" ulttyq portaly
