2008 jylǧy 29 mamyrda aiaq astynan Aqordaǧa şaqyryldym. Prezident qazaqtıldı bes basylymǧa interviu bermekşı eken. "Aiqynnan" Nūrtöre Jüsıp, "Türkıstannan" Şämşı Patteev, "Qazaq ädebietınen" Jūmabai Şaştaiūly, " Egemennen" Sauytbek Abdrahmanov (sūqbattyŋ moderatory) jäne " Ana tılınen" men eldıŋ ekonomikasynyŋ, onomastikanyŋ, "qazaqstandyq ūlt" mäselesın, tıl taǧdyryn qozǧadyq.
Aitqandai, Nauryzǧa bes kün demalys sūraǧanym esımde (keiın üş künge tüsırdı). Äzır ssenarii, ärine. Dese de, "Üştūǧyrly tıl" mäselesıne kelgende būdan qazaq tılı toqyraŋqyrap qalmai ma, dep abailaŋqyrai jazylǧan sūraqty, tatar aitpaqşy, usilit qylyp, "Üş tıldı bır arbaǧa jekken kezde qazaq tılı ana küştı ekı tılge şydastyq bere almai, omaqata qūlap jürmei me?!" dedım.
Moveton, ärine, menıkı. Bıraq so kezde eldıŋ auzynda jürgen söz edı. Alaida sūqbat beruşı jauabynda kenet özgerıp, maǧan qarap zıldenıŋkırep, zärlenıp söiledı. Olai bolmaitynyn däleldei. Kısını uysyna alyp tūratyn, alapasy asyŋqy adam eken. Sūraǧymdy keiın montaj jasaǧanda qiyp berdı, bıraq interviuerdı qaidan qisyn, zärlı jauaby so küiınde tūr, osy qalpyn Jürsın Erman baiqap qapty, keiın menen sūrady, "Ne boldy, ne sūradyŋ?" dep.
Aitpaqşy, ışımızde bıreuımız prezidenttıŋ köp kıtabynyŋ bıreuın ala kelgen eken, osy künderı ūlynyŋ tuǧan künı ekenın aityp, syilyqqa qoltaŋbasyn jazdyryp aldy. "Ap-mai, naǧyp oiyma kelmegen?!" dep, azdap opynyp qaldym. Pendemız ǧo...
Soŋynda prezident ştandarty qoiylǧan üsteldıŋ janynda sügıretke tüstık. Keşıgıp jüretın ädetım, eŋ şetke tūryp qappyn. Bıraq qaitkende de tūrmyn. Prezident ortalyǧynda ılulı tūrmyn. Tarihtyŋ qara taqtasynda.
Sonyŋ aldynda bır jaǧdai bolǧan. Raqymjan Otarbaev prezidenttıŋ balalyq şaǧy jaiynda "Nūrjauǧan ǧūmyr" deitın pesa jazyp, sahnalatty. Soǧan "Örge tartty aq keme" degen köldei resenziia-esse jazyp, spektakldy ışın keptırıp maqtadym. Marqūm Raqaŋnyŋ köŋılı üşın boluy kerek, dese de obektivtı tūrde spektakldıŋ bas keiıpkerın jaqtau, maqtau bolyp şyqty. Örge tartyp bara jatqan aq keme...
Bügınde tarihtyŋ enşısıne ötıp bara jatqan beiuaq kezeŋdı maqtau nauqanyna qatysuym osy ekı-aq jaǧdai boluy kerek. Bıraq sonyŋ özımen-aq men ömırlık ūstanymyma adam aitqysyz opasyzdyq jasaǧan ekenmın. Sebebın aitaiyn.
Avtorlyǧy Bruno Iаsenskiige telınetın bır söz bar: «Dūşpanyŋnan qoryqpa — köp bolsa atyp keter. Satqyndardan qoryqpa — köp bolsa satyp keter. Nemqūraidylardan qoryq — olar atpaidy da, satpaidy da, bıraq jer betındegı bütkıl zūlymdyq solardyŋ ünsız kelısımımen jasalady».
Küştıler men tıstılerge jalbaqtadym dep aita almaimyn, bıraq solarǧa nemqūraidylyqpen qaraǧanym, söitıp därmensızdık tanytqanym anyq.
Bügın — 29 mamyr. Menıŋ Arylu künım.
Qazaqty örkeniettık tyǧyryqqa äkep tırep tastap ketken 30 jyldyq" Aq kemenıŋ " tarihy jazyluy tiıs osy künderı ärqaisymyzdyŋ öz Arylu künımız boluy tiıs. Aityp arylatyn kün.
Özgeden būryn özıŋnıŋ aldynda qadırıŋdı ketırmes üşın. Qalǧan ömırıŋde Künnıŋ jaryǧyna tura qarap ötuıŋ üşın.
Maqsat Täj-Mūrat
Ūqsas jaŋalyqtar
