Ötken kündegı ekı oqiǧa kädımgıdei eseŋgırettı. Ekeuı elımızdegı balalardyŋ jaǧdaiyn äşkere etkendei, balalarymyz üşın elımız qauıpsız el emes ekenı anyq körındı.
Bırınşısı, Saryaǧaştaǧy oqiǧa. Bes jasar qyzdyŋ taǧdyry. Būl elımızdıŋ qūqyq qorǧau organdarynyŋ bylyqqa batqanynyŋ nätijesı. Bıraz, jūrt atu jazasyn engızu turaly aityp jatyr. Engızu kerek ondai azǧyndarǧa. Bıraq, odan da maŋyzdy dünie bar.
Ol qūqyq qorǧau salasyndaǧy ädılettılık. Oilaŋyzşy, būryn bır ret adam öltırıp sottalǧan adam, ekınşı ret bıreudı baltalap tastasa, ony üş jylǧa şartty jazaǧa kesıp bosata salu qandai logikaǧa, qandai ädılettı zaŋǧa siiady?
Erteŋ ölım jazasyn engızgen künde älı jetken, bailanysy jetken qūtylyp ketpesıne kım kepıl? Zaŋ tek älsızder üşın ǧana ıske asyp, bailanysy bar nemese aqşaly adam bılgenın ıstep jüre berse qalai el bolamyz...
Aitpaqşy, bızdıŋ elde qolynan kelse qonyşynan basudy dūrys sanaityndar köp. Bır jūldyzsymaqtyŋ balasy jalǧan qūjat jasap, ŪBT-ǧa kırse qolynan kelse ıstesın, ne köre almaisyŋdar deitın. Bır, jūldyzsymaq esırtkıge toiyp alyp, maşina aidasa erkelıgıŋdı köteretın halqyŋ qalmapty dep küŋırenetın qauyp tūrsa qandai qūqyqtyq el, qandai ädılettı Qazaqstan bolamyz?
Ekınşısı, Almatydaǧy 7 jasar qyzdyŋ ölımı. 10 şılde künı Almatyda jetı jasar qyzdy ögei şeşesı därethanaǧa baryp ülgermei, ülken däretın jıberıp qoiǧany üşın juynatyn bölmede aiausyz ūryp qatygezdıkpen öltırgen. Sonda qoiǧan kınäsı bölmenı lastaǧany bolǧan. Qaitys bolǧan kışkentai qyzdyŋ äkesı qarapaiym aula sypyruşy bolyp jūmys ısteidı, äielınen 15 jas kışı deidı.
Juynatyn bölmede ūryp-soǧyp, ölımşı etıp sabaǧan. Qyzdyŋ aiaǧy men qoly süiekterı synǧan, basy jarylǧan, denesınıŋ bärı kögergen, azappen köz jūmǧan. Eŋ aianyştysy būǧan deiın de körşıler balanyŋ kömek sūrap jylaitynyn aityp, bırneşe ret polisiiaǧa jügıngen, soŋǧy ret mamyr aiynda tärtıp saqşylary şaqyrylǧan, bıraq Bostandyq audanynyŋ uchaskelık polisiia qyzmetkerı eşteŋe ıstemegen deidı. Mıne, taǧy da polisiianyŋ kınäsı bar. Qūqyq qorǧau salasynyŋ jauapsyzdyǧy.
Al, ūryp öltırgen küdıktı ögei şeşe Baljan Tūrlybek degen qoǧam belsendısı eken. Ony bır saittar "qoǧam qairatkerı" dep jazyp taratyp jatyr. "Qairatker" degen sözdı de qor qyldy-au, äbden. Kım körıngennen qairatker jasaimyz. Kökbetten - tūlǧa, düleiden - batyr, şaipaudan ziialy jasap alatyn qoǧamǧa ainaldyq.
Ol da erteŋ aqtalyp ketse taŋǧalmaimyz. Bızde bärı mümkın ökınışke orai.
Eŋ qiyny, däl osy ekı oqiǧadan balalarymyz qauıpsız emes ekenın köremız. Bärımız bıtpes qu tırlıktıŋ soŋyndamyz. Üige qamasaŋ telefonnan özge ermegı joq, ondaǧy tärbienıŋ oŋbai tūrǧany da aqiqat.
Al, bır uaqyt dalaǧa şyqsa, aua jūtyp bala bop oinap şyqsa, bırge şyqpai taǧy bolmaidy. Qorqynyşty.
Zaŋ üstemdık qūryp, qūqyqtyq elge ainalmai bärı beker. Ädılettı qoǧam ornatuǧa bärımız mūqtajbyz.
Al, bilık soǧan talpynǧandardy qudalaidy, quǧyndaidy. Myna jerde bylyq bar, bylai tüzeteiık degen adamdy jau köredı. Işkı kuhniaǧa kırgızbeuge tyrysady. Būlai qalai el bolamyz?
Qatygezdık sonşa asqynyp kettı, nege?
Zaŋsyzdyq sonşa beleŋ alyp kettı, nege?
Jürekter nege sonşa qataiyp kettı?
Ädelttılıktı är bırımız talap etuge mındettımız!
Är bırımız jemqorlyqpen küresuge mındettımız!
Är bırımız qūqyqtyq el boluǧa äreket jasauǧa mındettımız!
Är bırımız qoǧamdaǧy är balaǧa qamqor boluǧa mındettımız!
Är bırımız zaŋdy saqtauǧa, saqtatuǧa äreket etuge mındettımız!
Äitpese, el bolmaimyz!!!
Ūqsas jaŋalyqtar
