Astanadaǵy qylmystyq ister jónindegi mamandandyrylǵan aýdandyq sotynda birneshe aptadan beri Kentaý qalasynyń eks-ákimi Rashıd Aıýpovtyń soty bolyp jatyr. Burynǵy ákimge kásipkerden 2,8 mıllıon dollar para aldy degen aıyp taǵylyp otyr, dep habarlaıdy "Adyrna" ulttyq portaly.
Eske sala keteıik, Rashıd Aıýpov 2022 jyly Kentaý qalasynyń ákimi bolyp taǵaıyndaldy. Sol jyldyń qazan aıynda ustaldy. Ol Alageum Group kompanııasynyń ıesi – belgili kásipker Saıdýlla Qojabaevtan 2,8 mln teńge para aldy degen kúdikke ilindi. Aldyn ala aıtylǵan aqparatqa qaraǵanda mundaı qarajat úshin Aıýpov tender uttyryp berýge ýáde etken.
Kásipkerdiń aıtýynsha, ekeýi 2013 jyly tanysypty. Olardy Kentaý transformator zaýytynda jumys istegen ortaq tanys Baǵlan Nurgeldıev tanystyrǵan.
Tergeý hattamasynda kórsetilgendeı, asa iri kólemde para alǵan Rashıd Aıýpov sol aqshaǵa aldymen Toyota Land Cruiser Prado jol talǵamaıtyn avtokóligin (13,4 mln teńge), Astanadaǵy BI Village kottedj qalashyǵynan úı (90 mln teńge) satyp alyp, týysynyń atyna jazdyryp qoıǵan. Sondaı-aq, birneshe júk kóligin de satyp alypty.
Bul qylmystyq iste Shymkent qalasynyń eks-ákimi Ǵabıdolla Ábdirahymovtyń de esimi jıi aıtylady. Ol ákim bolǵan kezde Aıýpov ákimdiktiń apparatyn basqardy. Ekeýi de «Bolashaq» baǵdarlamasynyń túlegi. Al, aryz jazǵan kásipker osynaý iri somany Ǵabıdolla Ábdirahymovtyń kómekshisine bergenin aıtady.
«Aqsha toly sómkeni osydan on jyl buryn kásipker Saıdýlla Qojabaevtyń uly Erkebulan Ilıasov pen Baǵlan Nurgeldıev Ǵabıdolla Ábdirahymovtyń kómekshisi Isamıdın Qantóreevke ákelip bergen», – delingen tergeý materıalynda.
Sot otyrysynda kásipkerdiń uly Erkebulan Ilıasov pen Rashıd Aıýpovtyń áńgimesiniń aýdıojazbasy tyńdaldy. Onda eks-ákim 2,8 mıllıon dollardan tek 100 myń dollar alǵanyn anyq aıtqan. Áńgime barysynda ol aryz ben kýáger sózinen ózin jáne Baǵlan Nurgeldıevti alyp tastaýdy birneshe ret suraıdy. Esesine Ǵabıdolla Ábdirahymovqa qatysty kompromat berýdi usynady. Onyń sózinshe, Ábdirahymovtyń de «arty taza emes», onyń zańsyz alǵan nysandary men fırmalary bar kórinedi.
«Mine, qara, shynymdy aıtamyn, men tek 100 myń dollar ǵana aldym, men ol aqshany ornyna qoıamyn. Ábdirahymovty otyrǵyzý ońaı, ol úshin biraq meni jáne Baǵlandy bul isten alyp tastańdar», – deıdi Rashıd Aıýpov kásipkerdiń ulyna.
Sotqa qatysqan Erkebulan Ilıasov da tosyn pikir bildirdi. Ol Aıýpov tarapynan Ábdirahymovqa qatysty tórt ret usynys túskenin aıtty. Degenmen, sottalýshynyń ózi bolsa bul sózderdi aıtpaǵanyn, Ábdirahymovqa qarsy kýálik bermeıtinin málimdep otyr.
"Adyrna" ulttyq portaly
