"Shekten shyǵyp barady!" Ózbekstan múftıi kıim kııý men saqal qoıýda musylmandardy ustamdy bolýǵa shaqyrdy

8409
Adyrna.kz Telegram
Ózbekstan múftıi Nýrıddın Holıknazarov dinı kıim kııýde shekten shyqqandardy synǵa aldy. Islam dininiń qara jamylyp, áıel betin tolyq tumshalap tastaýdy mindettemeıtinin "kesip ári naqty" aıtty.  Bul jaıly "Adyrna" ulttyq portaly Gazeta.uz  basylymyna silteme kórsete otyryp habarlaıdy. 
Ózbek múftıi Nýrıddın Holıknazarovtyń aıtýynsha, ıslam dini áıelderdiń betin tolyǵymen jabýdy jáne qara kıim kııýdi talap etpeıdi. Osylaı ol dinı kıim kııý, ózin ustaý, qajylyqqa barý máselelerine toqtalyp,dindegi shekten shyǵýshylyqty synǵa aldy.

"Dinı kıim kııý mádenıetinde shekten shyǵyp ketti. Islam belgili bir kıim kııýdi, belgili bir syrtqy kelbetti bildiredi degen pikir qalyptasty. Paıǵambarymyz qaldyrǵan qaǵıda bar. Islamda belgili bir forma qabyldanbaǵan, ol múmkin emes, ol bir ulttyń, bir klımattyń dini emes", - dedi Nýrıddın Holıknazarov.

Sonymen qatar, múftı dindi ultqa, salt-sanaǵa jiktep, bólshekteýdi qabyldamaıtyndyǵyn jetkizdi. "Islam búkil adamzatqa jiberilgen" dep málimdedi.

"Arabtardyń óz kıimi bar, túrikterdiń óz kıimi bar, Indonezııa men Malaızııadaǵy musylmandar óz kıimin kıedi, al ózbekter óz kıimin kıedi. Islam kıimge qatysty da ustamdy bolýdy jáne shekten shyqpaýdy úıretedi", - dedi Nýrıddın Holıknazarov.

Nýrıddın Holıknazarov Ózbekstandaǵy musylman áıelderden betin jabý, qara kıim kııý nemese qolǵap kııý talap etilmeıtinin basa aıtty. Ol musylmandardyń saqal qoıý máselesine de toqtaldy.

Múftı óz otandastaryn Islamdaǵy basqa da máseleler – namaz, qajylyq jáne ata-anaǵa degen kózqarasty oryndy ári durys túsindirýge shaqyrdy.

"Áleýmettik jelide bir kisi anasynyń aıaǵyn jýyp, sol sýdy iship jatqanyn kórip júrmiz. Dinimizde muny talap etpeıdi. Ata-anany qurmetteý olardyń aıaǵyn jýǵan sýdy ishý emes. Ata-anany qurmetteý olardy Qaǵbaǵa aparyp, búkil álemniń kózinshe aıaǵyn súıý emes", - dedi Nýrıddın Holıknazarov.

Ol ata-anaǵa kómektesip, muń-muqtajyn ótep, batasyn alý kerek ekenin aıtty. Qalǵanyn shekten shyqqandyqqa balady.

 

"Adyrna" ulttyq portaly

 

 

Pikirler