Oblys ortalyǵynda Jezqazǵan qalasy ákimdiginiń uıymdastyrýymen "ZHEZKAZGAN ALTYN KUZ" atty jartylaı marafon ótti. Marafonǵa jalpy Qazaqstannyń túpkir túpkirinen jáne Reseı, Ýkraına, Manǵolııa memleketterinen marafonshylar qatysty dep habarlaıdy Jezqazǵan qalasynyń baspasóz qyzmeti.
"ZHEZKAZGAN ALTYN KUZ" júgirisine elimizden bólek, Reseı, Mońǵolııa jáne Ýkraınadan kelgen áýesqoı sportshylar qatysty. Jezqazǵan qalasy ákiminiń orynbasary Erlan Qusaıynov marafonǵa qatysýshylarǵa sáttilik tilep, marafonshylarmen birge júgirdi.
Jartylaı marafonda qatysýshylar eki qashyqtyq boıynsha júgirdi. Atap aıtqanda, 10,5 jáne 21,5 shaqyrym aralaǵyn qurady. Dástúrli shara osymen 4-shi márte uıymdastyrylyp otyr. Qatysýshylar arasynda jastardan bólek, jasy egde tartqan jandar da kóp boldy.
“Shaǵyn shaharda jeńil atletıkany damytý maqsatynda qolǵa alynǵan marafon - birtindep qoǵamdyq sıpat aldy. Marafonnyń basty maqsaty — buqaralyq sportty damytý men salaýatty ómir saltyn qalyptastyrý. Bizdiń qalamyzda buqaralyq sportty damytýǵa erekshe kóńil bólinýde, búgingi kúni osyndaı aýqymdy dárejede tórtinshi ret qalalyq jartylaı marafon ótkizilip jatyr jáne marafonǵa shetelden jáne basqa qalalardan sportshylarymyz qatysýda. Bul qýantatyn jáıt. Bul sportshylarymyzdyń salamatty ómir saltyn ustanýǵa degen qyzyǵýshylyǵy artqanyn kórsetedi. Búgingi jarysqa 300-den asa jelaıaq qatysýda. Marafonǵa qatysýshylardyń sany jyl sanap ósýde. Jarysty jyl saıyn ótkizý dástúrge aınaldy. Kelesi jyly Jezqazǵan qalasynyń 70 jyldyq mereıtoıynda budan da úlken deńgeıde ótkizý josparlanýda”, - deıdi Jezqazǵan qalasy sport bóliminiń basshysy Zýhrap Daýmbaev.
2 saǵatqa sozylǵan jartylaı marafon óz máresine jetip, Astana, Almaty, Qaraǵandy qalalarynyń áýesqoı sportshylary alǵashqy úshtikten kórindi. Jeńimpazdarǵa aqshalaı syıaqylar men madaqtama qaǵazy, arnaıy medal tabys etildi.
