25 jeltoqsanda jastarmen kezdesý barysynda Olıı Majlıs Senatynyń tóraǵasy Tanzıla Narbaeva Ózbekstan eshqashan bireýdiń otary bolmaıtynyn aıtty, dep habarlaıdy «Adyrna» ulttyq portaly Gazeta.uz saıtyna silteme jasaı otyryp.
«Internetten «Ózbekstanmen mynany isteıik, mynany isteıik» degen ártúrli sózderdi kóresiz. Ózbekstan eshqashan bireýdiń otary bolmaıdy. Sizder muny bilesizder, maǵan ony túsindirýdiń qajeti joq. Bul bárińizdiń júregińizde», - dedi parlamenttiń joǵarǵy palatasynyń basshysy.
Ótken aptada «Ádiletti Reseı» partııasynyń teń tóraǵasy Zahar Prılepın Ózbekstan men burynǵy KSRO-nyń basqa da aýmaqtaryn Reseıge «anneksııalaýdy» usyndy. Bul málimdeme Ózbekstan jurtshylyǵynyń ótkir synyna ushyrady.
Ózbekstan Syrtqy ister mınıstrligi Reseıdiń Tashkenttegi elshisi Oleg Malgınovty shaqyryp, Prılepınniń málimdemesi ádeıi arandatýshylyq jáne eki el halyqtary arasyndaǵy qarym-qatynasqa keri áser etýi múmkin ekenin aıtty. Kóp uzamaı Reseı Syrtqy ister mınıstrliginiń resmı ókili Marııa Zaharova Prılepınniń sózderi «Reseı Federaııasynyń resmı ustanymyn kórsetpeıdi» dep málimdedi.
Juma kúni prezıdent Shavkat Mırzıeev respýblıkalyq rýhanııat jáne aǵartý keńesiniń otyrysynda: «biz buryn dıplomatııa men saıasat arqyly óz maqsaty men múddesin qorǵaǵan álemniń qýatty ortalyqtary ashyq qysym kórsetýge, janjal men qaqtyǵystar jolyna túskenine kýá bolyp otyrmyz», - dedi.
Tanzıla Narbaeva jastarmen tildese otyryp, ótken ǵasyrdyń basyndaǵy qoǵamdyq-saıası aǵartý qozǵalysynyń ókilderi – jádıdshilerdiń qyzmetin zertteýdiń nelikten mańyzdy ekendigi týraly máseleni de kóterdi.
«Oıymyz ben isimiz birlikte bolýy kerek» dep babalarymyz atap ótken. Jádıdshiler adamdardy nurǵa bet burýǵa, zamanaýı ǵylym men zamanaýı kásipterdi ıgerýge shaqyrdy», - dep atap ótti ol.
«Olar uzaq jyldar boıyna umyt qaldy. Endi, mine, qurmetti prezıdentimizdiń is-áreketiniń arqasynda olar jaryqqa shyǵyp jatyr», – deıdi Tánzıla Narbaeva.
Atalmysh jıynda jádıdshiler týraly sóz qozǵaǵan Shavkat Mırzıeev: «Bizge sý men aýadaı, batystyń ǵylymı jetistikterimen, ulttyq qundylyqtarmen sanasatyn, jádıdshi atalarymyz sııaqty bilimdi, kemel kadrlar kerek», - dedi.
«Adyrna» ulttyq portaly
