Muhtar Maǵaýın aǵamyzdyń Aııa qaryndasyma bergen suhbaty toǵyshar, jalpaq shesheı qoǵamnyń ústine laqtyrylǵan bomba sııaqty áser etti-aý deımin. FB- shýlap ketipti, bireý maqtap, bireý dattap jatyr.
Bul jerde Aqseleý aǵamyzdyń "Ony moıyndamasaq, betbaqtyq bolar edi. Minezi onyń ózimen birge ketedi. Al jazǵandary halyqtyń ıgiligi bolyp qalady. Qazaq tarıhyna qatysty koneptýaldi keıbir oılary tarıh ınstıtýtynyń da túsine kirmeıdi. Onyń jazǵandarynyń ishinde jaman nárse bar dep aıta almaımyn" degen baǵasy eske túsedi. Biz konformıst qoǵambyz, bul sovet úkimetinen alǵan enshimiz, men de konformıstpin. Bolyp jatqan ádiletsizdikti, zorlyqty, qarlyqty, ótirikti kórip otyryp úndemeımiz. "Páleden mashaıyq qashypty" dep júre beremiz, sebebi jamandyqpen ustasamyn dep jazyp otyrǵan kitabyń toqtap qalady, shyǵarmashylyq jumys júrmeı qalady t.b.
Áıtpese, ózge salany aıtpaı-aq qoıaıyn, bizdiń tarıh ǵylymy, oqý oryndary salasynda qanshama problemalar bar. Áli sovettiń shınelimen otyr, oǵan rýshyldyq qosyldy, ǵylymǵa maman daıyndaýda blat-svaty bar, haltýra, kózboıaýshylyq bar. Biraq bir adam osyny aıtýy kerek, áıtpese bizdi qoǵam dep aıtýǵa bolmaıdy.
Óziniń esebin, pendeshiligin bylaı qoıyp aýrý qoǵamnyń aýrýyn ádil kórsetetin maman- kósemderi bolady. Bizdiń qoǵamnyń aýrýy búgin paıda bolǵan joq, áride jatyr. Quldy qul, satqyndy satqyn dep aıtatyn kezeń keldi. Quldardyń, satqyndardyń salyp bergen jolymen júrsek áli de júre beremiz.
Muhtar aǵamyzdy osy turǵydan qabyldaǵan jón, ózim osylaı qabyldadym.
Jambyl Artyqbaev
