1930 jyly 4 säuır künı Bırıkken memlekettık saiasi basqarma (OGPU) alqasynyŋ ükımımen Ahmet Baitūrsynov bastaǧan qyryqqa juyq adam ärtürlı merzımderge qamaluǧa, jer audaryluǧa kesılgen bolatyn.
Ahmet Baitūrsynov, Mırjaqyp Dulatov, Myrzaǧali Esbolov, Hälel Ǧabbasov, Dınmūhamed Ädılov, Jüsıpbek Aimauytov, Ǧazymbek Bırımjanov, Äbdırahman Baidıldin, Asqar Dulatov, Temırjan Esmaǧambetov jäne taǧy basqalary (barlyǧy 20 adam) atu jazasyna kesıldı.
Sol ükımmen Maǧjan Jūmabaev, Eldes Omarov, İbragim Sätbaev, Äbuäli Ädılov, Asqar Ädılov, Abdolla Ūzaqbekov alǧaşynda 10 jyldyq merzımge konslagerge kesılıp, būl ükım keiın Soltüstık ölkege jer audarumen almastyryldy. Al Kärım Jälenov, Darhan Kenjebaev, Töreqūl Mūratov, Aqbar Ybyraev, Nūrlan Kärıbaev, Alǧabek Baidullaev bes jyl merzımge konslagerge jıberıldı.
Alaş qozǧalysyna qatysqandardy (Alaş partiiasy men Alaşorda ükımetıne müşe bolǧan jäne olardy jaqtaǧandardy) Keŋes ükımetınıŋ jappai tūtqynǧa alu 1928 jyldan bastalǧan edı.
1932 jyly 20 säuırde OGPU üştıgınıŋ ükımımen Mūhametjan Tynyşpaev bastaǧan Alaş qozǧalysynyŋ 20-dan astam müşesı jazalandy. Olardyŋ qatarynan Tynyşpaev, Köşmūhamed (Qoşke) Kemeŋgerov, Halel Dosmūhamedov, Aldabergen Ümbetbaev, Janşa Dosmūhamedov, Äşır Qojamqūlov, Kärım Toqtabaev, Ahmet Tūnǧanşin, Äbdırahman Mūŋaitbasov, Äşım Omarov, Jūmahan Küderin, Mūstafa Būralqiev, Äbdıhamit Aqbaev, Jaqyp Aqbaev, Seidäzım Qadyrbaev, Mūhtar Murzin bes jyl merzımge Reseidıŋ Voronej oblysyna jer audaryldy. Olar audarylyp barǧan jerlerınde saiasi senımsız adamdar retınde OGPU organdarynyŋ baqylauynda boldy.
Osy toppen bırge bastary ıstı bolǧan Mūhtar Äuezov, Uälihan Omarov, Bıläl Süleev, Älımhan Ermekov, Daniial Ysqaqov aldyn-ala tergeude türmede otyrǧan uaqyty eseptelıp bosatyldy.
“Alaş ısımen” 1930 jäne 1932 j. sottalǧandardan M.Dulatov, J.Aimauytov, Ä.Baidıldin, A.Dulatov, K.Toqtabaev elge qaityp oralmady. Al qaityp oralǧandary 1937 — 38 jyldardaǧy “ülken terror” kezınde “halyq jauy” degen jalǧan aiyppen tügelge derlık atyldy.
