Atyraýǵa gýmanıtarlyq júk artyp jatqanda qaza bolǵan azamat búgin jerlendi, dep habarlaıdy "Adyrna" tilshisi.
Túrkistan oblysynyń turǵyny Qaıyrbek Álimbekulynyń artynda jary men 7 balasy, múgedek inisi qalǵan. Ol týraly jýrnalıst Dıas Nuraqyn jazdy.
"13.04 kúni Atyraýǵa kómekke attanǵaly jatqan baýyrymyz "Hovo" júk kóligin vagonǵa artyp jatqanda oqystan kólik dońǵalaǵy vagonnan taıyp ketip, óz kóliginiń astynda qalyp qoıyp, 7 balanyń ákesi 37 jastaǵy Qospanov Qaıyrbek Álimbekuly degen baýyrymyz marqum boldy. Bala kúnimnen birge ósken ári kórshim ári dosym edi. Óte meıirimdi kimge kómek qajet bolsa qol ushyn sozýǵa asyǵyp turatyn azamat edi. Sońǵy is áreketi de eli úshin kómekke asyǵý bolypty. Kómekke attanar aldyn óte qýanyshty halde bolyp júr edi, jaqsy tilekter aıtyp shyǵaryp salyp edik, amal neshik jete almady", - delingen jýrnalıstke kelgen hatta.
Yntaly aýylynyń turǵyny Qaıyrbek Álimbekulyn jerleý rásimi búgin ótti. Marqumnyń joldasy Sara 7 balamen jesir qalǵanyn aıtady.
"Búgin jerledik. Qolymda eki qaınym bar. Bireýi úshinshi toptaǵy múgedek. Balalarymnyń úlkeni 16 jasta. 10 synypta oqıdy. Al eń kenjem 2 jasta", - deıdi.
Qazir jergilikti jýrnalıster otbasyna arnalǵan qor ashyp, qarjylaı kómek kórsetýde.
