Búgin qazaqtyń tuńǵysh kıno operatory Eskendir Tynyshbaevtyń týǵanyna - 115 jyl.
Qazaqstannyń eńbek sińirgen óner qaıratkeri Tynyshpaev Eskendir Muhamedjanuly 1909 jyly 9 mamyr kúni Ashhabadta dúnıege kelgen.
Belgili ǵalym, qoǵam qaıratkeri, qazaqtyń tuńǵysh ınjener-temirjolshysy Muhamedjan Tynyshpaevtyń uly.
Ol kınodaǵy eńbegin 1928 jyly bastady. «Vostokkıno» stýdııasynyń qazaq bóliminiń ashylýyna jáne «Sońǵy jańalyqtar» qazaq kınojýrnalynyń qurylýyna qatysty.
Eskendir Tynyshpaev Qazaqstannyń tarıhy týraly birqatar joǵary kórkemdik oıyn jáne derekti fılmder túsirdi. Oǵan myńdaǵan fotoshedevrler tıesili. Ol kınooperatordan avtorlyq fılmderdiń rejısseryna deıingi joldy ótip, qazaq kınosynda alǵash ret trıýktar túsire bastady.
Ony qazaq kınosynyń aqsaqaly dep ataıtyn. Sebebi E.Tynyshpaev Sháken Aımanovpen, Májıt Beǵalınmen, Kenenbaı Qojabekovpen, Oraz Ábishevpen jáne qazaq kınosynyń ózge de maıtalmandarymen birge ulttyq kınematografııanyń damýyna belsene qatysty. Ol «Qazaqfılmniń» qurylýyna etene aralasyp, onda uzaq jyldar boıy bas operator bolyp jumys istedi.
Eskendir Tynyshpaev «Keńestik Qazaqstan» kınojýrnaly úshin 10 myńnan astam sıýjet túsirdi. «Biz Jetisýdanbyz», «Onyń ýaqyty keledi» kórkemdik fılmder - onyń úzdik jumystary.
