Jat aǵymnyń jeteginde ketken qazaqstandyq áıelder Sırııada bala-shaǵasymen arpa, shóp jep áreń aman qalǵan. Týǵan jerlerine jetý úshin tórt táýlik boıy jaıaý júrip kelipti. «Jýsan» operaııasymen elge oralǵandardyń ishinde qaraǵandylyqtar da bar.
«Jolǵa shyqqanymyzda maǵan Sırııaǵa ketip bara jatqanymyzdy aıtty. Sol sátte shok jaǵdaıynda turdym. «Qalaı Sırııaǵa? Áıelder ol jaqta ne isteıdi? Ol jaqta soǵys bolyp jatyr emes pe?» dedim. Al ol kúıeýi aıtqandy áıeliniń oryndaýy kerektigin aıtty. Jyladyq, shý shyǵardyq. Munyń barlyǵy jolda boldy», - deıdi qaraǵandylyq áıel.
Sondaı-aq, ol Sırııada júrip ózderinen buryn balalardyń qınalǵanyn aıtady. Sebebi, as joq bolǵandyqtan, kósheden tapqandaryn jeýge májbúr bolǵan eken.
«Kenjeme 40 kún tolǵan edi. Ol shetinep ketti. Keıin ári-beri kóship júrdik. Biraq sońǵy jarty jylda dalada turdyq. Ol jaqta tamaq bolmady, jýyndy iship, shóp jedik. Ashtan ólmeý úshin adam kez kelgen nárseni jeı beredi eken. Mundaı asty balalardyń asqazanynyń kótermegeni ras. Muny adamdar jemeıdi ǵoı», - deıdi ol.
Budan ózge ol Sırııada sońǵy ýaqytta kimniń kim ekenine qaramaı bárin bombalap jatqanyn aıtyp nalydy. Tipti, kishkene búldirshinderge deıin aıamaǵan eken.
"Adyrna" ulttyq portaly
