Rámizder - rýh pen jannyń sımvoly

5255
Adyrna.kz Telegram
foto ashyq aqparat kózderinen alyndy
foto ashyq aqparat kózderinen alyndy

Kez kelgen memlekettiń rámizderi eldiń egemendigin, tuǵyrly táýelsizdigin, jekelegen jetistikterin, halqynyń birligin bildiredi. Rámizder - ulttyń ulylyǵyn, jurttyń jaýyngerligin, qarapaıym halyqtyń qaıraty men bıliktiń bıigin bildiretin rýh pen jannyń sımvoly.

Memleket rámizder banknottarǵa, monetalarǵa, blankilerge, mórlerge jáne qajet bolǵan ózge de oryndarda ornalastyrylý arqyly, eldiń tutastyǵy men derbestiginen kórinis beredi. Mundaǵy alýan belgiler men túrli túster ár eldiń tamyrly tarıhy men bútin bolashaǵynan syr shertedi, soǵan qaraı beıimdelip jasalynady. San jyldar boıy qalyptasqan, ósip óngen, kemeldiktiń shyńyna shyǵý, sharaınada sharyqtaý úshin qantógisken, jan alyp, jan bergen jandar, táýelsizdiktiń saltanatty saltyn qurdy. Búgin de olardyń urpaqtarynda sol sarǵaıǵan sara joldyń sarynymen dúnıege kelgen altynǵa bergisiz memekettik rámizderi, sımvoldary bar. Olar úsheý: tý, ánuran jáne eltańba. Búginge deıin bul úsheýiniń maǵynasy da, túpki mánisi de aıtylyp kele jatyr.

Eýropalyq elderdi qarastyratyn bolsaq, bastapqyda knıazdikterdiń bytyrańqy ómir súrý kezeńinde birtutas memlekettik rámizder bolǵan joq. Al knıazderdiń árqaısysy óz qalaýy boıynsha kúsh, bılik pen qudiretin bildirý úshin jalaýshada, monetalarda, mórlerde beınelengen arystandar, búrkitter, grıffınder jáne basqa da janýarlardy tańdaıtyn bolǵan. Al qazaq handyǵy kezeńinde bizdiń ata-babalarymyz baıraqtar paıdalanǵan. “Alashtyń aq týynyń astynda” degen sekildi sóz tirkesteride bul oıymyzǵa dálel bolatyndaı. Shyn mánisinde, ejelgi jaýgershilik zamanyndaǵy qazaq handary men batyrlarynyń týlary, jalaýlary men baıraqtaryna qatysty naqty derekter az. Alaıda túrik-qazaq jalaýlary jaıly eńbek jazǵan Álkeı Marǵulannyń eńbekterinde keltirilgen derekterge súıensek, qazaq handary kótergen jalaý qyzyl tústi, ensiz, shetinde úsh-toǵyz quıryq baılanǵan ortasyna tóre tańba kestelengen. Ári mundaı jalaýlar Shyńǵys han urpaqtaryna tán desedi. Kezinde qazaqtyń nebir ot tildi, oraq aýyzdy jyraýlary jaýyngerlerdiń naıza ushyna tý baılap, jaýǵa shapqan teńdessiz erlikteri haqynda talaı márte jazǵan.

Búgingi kúni memlekettik rámizder el jastarynyń boıyndaǵy patrıotızmdi nyǵaıtýda jáne mádenı-tarıhı jadyny saqtaýda, elimizdiń keshegi men búgingi saıası ekonomıkalyq ahýalyn tereń ári júıeli taldaýǵa, tuǵyrly táýelsizdiktiń mánin túsinip, ardaqtaýda asa mańyzdy ról atqarady. Eger halyqtyń memlekettik rámizderge qatynasy, eldiń "rýhy" men onyń elıtasynyń kórinisi týraly aıtatyn bolsaq, onda qoldanystaǵy júıeni qoldaý dárejesin, belgili bir saıasattyń, ıdeologııanyń tıimdiligin baǵalaýǵa bolady.

Pikirler