Rämızder - ruh pen jannyŋ simvoly

Kez kelgen memlekettıŋ rämızderı eldıŋ egemendıgın, tūǧyrly täuelsızdıgın, jekelegen jetıstıkterın, halqynyŋ bırlıgın bıldıredı. Rämızder - ūlttyŋ ūlylyǧyn, jūrttyŋ jauyngerlıgın, qarapaiym halyqtyŋ qairaty men bilıktıŋ biıgın bıldıretın ruh pen jannyŋ simvoly. Memleket rämızder banknottarǧa, monetalarǧa, blankılerge, mörlerge jäne qajet bolǧan özge de oryndarda ornalastyrylu arqyly, eldıŋ tūtastyǧy men derbestıgınen körınıs beredı. Mūndaǧy aluan belgıler men türlı tüster är eldıŋ tamyrly tarihy men bütın bolaşaǧynan syr şertedı, soǧan qarai beiımdelıp jasalynady. San jyldar boiy qalyptasqan, ösıp öngen, kemeldıktıŋ şyŋyna şyǧu, şarainada şaryqtau üşın qantögısken, jan alyp, jan bergen jandar, täuelsızdıktıŋ saltanatty saltyn qūrdy. Bügın de olardyŋ ūrpaqtarynda sol sarǧaiǧan sara joldyŋ sarynymen düniege kelgen altynǧa bergısız memekettık rämızderı, simvoldary bar. Olar üşeu: tu, änūran jäne eltaŋba. Bügınge deiın būl üşeuınıŋ maǧynasy da, tüpkı mänısı de aitylyp kele jatyr. Europalyq elderdı qarastyratyn bolsaq, bastapqyda kniazdıkterdıŋ bytyraŋqy ömır süru kezeŋınde bırtūtas memlekettık rämızder bolǧan joq. Al kniazderdıŋ ärqaisysy öz qalauy boiynşa küş, bilık pen qūdıretın bıldıru üşın jalauşada, monetalarda, mörlerde beinelengen arystandar, bürkıtter, griffinder jäne basqa da januarlardy taŋdaityn bolǧan. Al qazaq handyǧy kezeŋınde bızdıŋ ata-babalarymyz bairaqtar paidalanǧan. “Alaştyŋ aq tuynyŋ astynda” degen sekıldı söz tırkesterıde būl oiymyzǧa dälel bolatyndai. Şyn mänısınde, ejelgı jaugerşılık zamanyndaǧy qazaq handary men batyrlarynyŋ tulary, jalaulary men bairaqtaryna qatysty naqty derekter az. Alaida türık-qazaq jalaulary jaily eŋbek jazǧan Älkei Marǧūlannyŋ eŋbekterınde keltırılgen derekterge süiensek, qazaq handary kötergen jalau qyzyl tüstı, ensız, şetınde üş-toǧyz qūiryq bailanǧan ortasyna töre taŋba kestelengen. Ärı mūndai jalaular Şyŋǧys han ūrpaqtaryna tän desedı. Kezınde qazaqtyŋ nebır ot tıldı, oraq auyzdy jyraulary jauyngerlerdıŋ naiza ūşyna tu bailap, jauǧa şapqan teŋdessız erlıkterı haqynda talai märte jazǧan. Bügıngı künı memlekettık rämızder el jastarynyŋ boiyndaǧy patriotizmdı nyǧaituda jäne mädeni-tarihi jadyny saqtauda, elımızdıŋ keşegı men bügıngı saiasi ekonomikalyq ahualyn tereŋ ärı jüielı taldauǧa, tūǧyrly täuelsızdıktıŋ mänın tüsınıp, ardaqtauda asa maŋyzdy röl atqarady. Eger halyqtyŋ memlekettık rämızderge qatynasy, eldıŋ "ruhy" men onyŋ elitasynyŋ körınısı turaly aitatyn bolsaq, onda qoldanystaǧy jüienı qoldau därejesın, belgılı bır saiasattyŋ, ideologiianyŋ tiımdılıgın baǧalauǧa bolady.