Memlekettik aýdıt organdary 570 mlrd teńgeniń tıimsiz jumsalǵanyn anyqtaǵan, dep habarlaıdy “Adyrna” ulttyq portaly Orda.kz saıtyna silteme jasap.
Respýblıkalyq bıýdjettiń atqarylýyn baqylaý jónindegi esep komıtetiniń tóraıymy Natalıa Godýnova memleketten bólingen qarajatty tıimsiz jumsaýdy boldyrmas úshin jaýapkershilikti kúsheıtý kerek degen oıda.
– Ár teńge tıimdi jumsalýy kerektigin eskersek, buǵan jol berýge bolmaıdy. Sondyqtan biz byltyr bastaǵan memlekettik resýrstardy tıimsiz paıdalanǵany úshin laýazymdy adamdardyń jaýaptylyǵyn kúsheıtý jónindegi jumysty jalǵastyrý óte mańyzdy dep sanaımyz, – dedi Godýnova.
Qazirgi tańda bıýdjetti tıimsiz qoldaný boıynsha tek eki ákimshilik jaza qarastyrylǵan. Natalıa Godýnova «zańǵa taǵy úsh jańa norma engizý kerek» deıdi.
– 2021 jyldyń basynan beri 11 laýazymdy tulǵa jazalandy. Normany ońdy-soldy qoldaný faktileri kezdesken joq. Zań buzýshylyqtyń aldyn alýǵa, boldyrmaýǵa septigin tıgizýde. Biraq, ázirge tek onyń qoldanylý aıasy óte tar, – dedi Respýblıkalyq bıýdjettiń atqarylýyn baqylaý jónindegi esep komıtetiniń tóraıymy.
