30 shilde kúni El Táýelsizdiginiń 30 jyldyǵyna oraı, «Rýhanı jańǵyrý» baǵdarlamasy aıasynda Fort-Shevchenko qalasynyń jastary tarıhı oryndarǵa jaıaý joryq jasady.
Joryqtyń maqsaty - qalanyń mádenı-tarıhı oryndaryn, olardyń qundylyǵyn jastarǵa tanystyrý bolyp tabylady. Jastardan quralǵan jaıaý joryq jasaǵy sáýlet qurylysynyń sırek kezdesetin eskertkishine jatatyn, usta Idiris Serikbaevtyń úıine, qazaq, túrikmen, orys, ýkraın halyqtarynyń birlese otyrǵyzǵan ortalyq saıabaǵyna, Novopetrovsk qamalynyń qırandylary saqtalǵan oryn men gotıkalyq stılde salynǵan tarıhı «Kók mektep» ǵımaratyna bardy. Budan bólek, jaıaý joryq jasaǵy júrip ótken jerler tiziminde saıası qýǵyn-súrgin qurbandarynyń memorıaly da, 1909-1911 jyldary salynǵan Aqmeshit ǵımaraty da bar.
«Mańǵystaý tarıhynyń qarashańyraǵy sanalatyn Túpqaraǵan aýdany tarıhı oryndarǵa baı ekeni belgili. Mundaı oryndar Fort-Shevchenko qalasynyń aýmaǵynda da kóp. Bizdiń maqsatymyz – osy oryndardy qasterleı bilýdi, tarıhyn jadymyzǵa toqyp, ózge zamandastarymyzǵa tanystyra júrýdi kózdeý. Jaıaý joryǵymyzǵa 30 jasty tarttyq. Olardyń búgin sanasyn sergip, tarıhı málimetterge qanyqqanyna senimdimin. Menińshe, eldi súıý úshin aldymen tarıhyńdy bilýiń qajet dep oılaımyn»,- deıdi uıymdastyrýshy, Túpqaraǵan aýdandyq jastar resýrstyq ortalyǵy dırektorynyń mindetin atqarýshy Tájbenova Gúlǵasıra.
«Adyrna» ulttyq portaly
