وقۋ-اعارتۋ ءمينيسترى جۇلدىز سۇلەيمەنوۆا پەداگوگتەردى اتتەستاتسيالاۋ توڭىرەگىندەگى كوپ جىلدىق داۋلارعا نۇكتە قوياتىن شەشىم تۋرالى ايتتى، دەپ حابارلايدى «ادىرنا» ءتىلشىسى.
ول پرەزيدەنت قاسىم-جومارت توقاەۆتىڭ تاپسىرماسى بويىنشا مۇعالىمدەردىڭ پاندىك ءبىلىمىن تەكسەرۋ تولىقتاي توقتاتىلعانىن جەتكىزدى.
«مەنىڭ ويىمشا، مەملەكەت باسشىسى سىزدەرگە زور سەنىم ارتىپ، ۇلكەن جاناشىرلىق تانىتۋدا. بارشاڭىزدى قۇتتىقتايمىن. وسى شەشىم تۋرالى رەسمي حات ءبىلىم باسقارمالارىنا جولداندى»، – دەدى مينيستر Instagram جەلىسىندەگى رەسمي پاراقشاسىندا.
ايتۋىنشا، بۇل قادام مۇعالىمدەردىڭ كاسىبيلىگىن مويىنداۋدى جانە ولاردى ارتىق كۇيزەلىس پەن بيۋروكراتيالىق قىسىمنان ارىلتۋعا دەگەن مەملەكەتتىڭ ۇمتىلىسىن كورسەتەدى.
پاندىك ءبىلىمدى باعالاۋ ءراسىمى باستاپقىدا وقىتۋ ساپاسىن باقىلاۋ ءۇشىن ەنگىزىلگەن بولاتىن. كەيىننەن ول ۇستازداردىڭ سىنىنا ۇشىرادى. ەل بويىنشا مۇعالىمدەر جىل سايىنعى تەستىلەر پسيحولوگيالىق قىسىم تۋعىزاتىنىن جانە پەداگوگتەردىڭ وقۋشىلارمەن جۇمىس ىستەۋگە جۇمسايتىن ۋاقىتىن الاتىنىن بىرنەشە رەت ايتقان.
بۇعان دەيىن جۇلدىز سۇلەيمەنوۆا بالالاردى ءبىرىنشى سىنىپقا قابىلداۋ ءۇشىن قۇجات تاپسىرۋ مەرزىمدەرىنىڭ قايتا قارالاتىنىن حابارلاعان بولاتىن.
