وسى جىلدىڭ 1 اقپانىنان باستاپ قازاقستاندا كوروناۆيرۋسقا قارسى ۆاكتسيناتسيا باستالعانى بەلگىلى. تالدىقورعاننىڭ №2 ەمحاناسىندا ۆاكتسينانى الۋدان بۇرىن ادامدار دارىگەرلەردەن تەكسەرىلۋى جانە ءوز دەنساۋلىعىنىڭ جاي-كۇيى تۋرالى بارلىعىن مۇقيات بىلۋگە ءتيىس، دەپ جازادى «ادىرنا» ۇلتتىق پورتالى Ratel.kz-كە سىلتەمە جاساپ.
كلينيكا باس دارىگەرىنىڭ ورىنباسارى ينديرا جاڭابەكوۆا تۇسىندىرگەندەي، قازىرگى ۋاقىتتا ولار قاۋىپتى ەمدەۋ مەكەمەلەرىنىڭ قىزمەتكەرلەرىن ۆاكتسيناتسيالايدى. ينديرانىڭ ايتۋىنشا، ۆاكتسيناتسيادان بۇرىن ولار قارسى كورسەتكىشتەردى انىقتاۋ ءۇشىن ارىپتەستەرىنەن مۇقيات سۇحبات الادى. دارىگەرلەر كەيدە ءوز دەنساۋلىعىنا نەمقۇرايلى قارايدى دەيدى.
- ءسىز ءوزىڭىزدىڭ بارلىق قارسى كورسەتكىشتەرىڭىزدى ءبىلۋىڭىز كەرەك، دەنساۋلىعىڭىز تۋرالى مالىمەت بولماسا، ەگۋ كەڭسەسىنە كەلۋدىڭ قاجەتى جوق. دارىگەرلەر ءوز دەنساۋلىعىنان حاباردار. سول سەبەپتى دە ولارعا وسى جەردە ەكپە جاسايمىز. ال ءوز دەنساۋلىعىنان حابارسىز ادامعا ەكپە جاسامايمىز. مىسالى، تاياۋدا تۇرمىستاعى كەلىنشەك ەكپە جاساتپاق بولدى. ءالى بالالارى جوق ول كەلىنشەككە قالاي ەكپە جاساۋعا بولادى؟ مۇمكىن ول ەكپە الۋ كەزىندە جۇكتى شىعار؟ الگى كەلىنشەك ەكپە جاساتقىسى كەلدى. الايدا ءبىز باس تارتتىق. ەندى ءبىر ادام ۆ گەپاتيتىنە قارسى ەكپە العان. ال بىزدە ناقتى ايتىلعان: باسقا ۆاكتسينالاردى العاننان كەيىن كەمىندە ءتورت اپتا وتپەي، كوۆيد ەكپەسىن سالۋعا بولمايدى. بۇل ادامعا دا ەكپە سالۋدان ءبىز ۋاقىتشا باس تارتتىق، - دەپ ءتۇسىندىردى ينديرا جاڭابەكوۆا.
جاڭابەكوۆانىڭ ايتۋىنشا، ۆاكتسيناتسيا ەرىكتى تۇردە جۇرەدى جانە دارىگەرلەردى ەشكىم ماجبۇرلەمەيدى. ەستەرىڭىزگە سالا كەتەيىك، وتكەن اپتادا ءدال №2 ەمحانادا ۆاكتسينا العان ءبىر مەدبيكە اۋىرىپ قالدى. وعان جەدەل جاردەم شاقىرىلدى. كەيىن زارداپ شەككەن مەدبيكە الەۋمەتتىك جەلىدە ۆيدەو جاريالادى، وندا ول جاي قورقىپ، قازىر ءوزىن جاقسى سەزىنەتىنىن جانە كەلەسى ەگۋدى كۇتەتىنىن ايتتى. كەلەسى ەكپەنى ءۇش اپتادان كەيىن الۋ كەرەك ەكەنى بەلگىلى.
