2025 jylǧy 29 qazanda Mäjılıstıŋ jalpy otyrysynda «Aq jol» fraksiiasynyŋ deputattary qazaq ädebietınıŋ damuy jäne memleket pen ädebiet arasyndaǧy ruhani dialogtyŋ qajettılıgı turaly saual joldaǧan bolatyn. Osyǧan orai Qazaqstan Jazuşylar odaǧy resmi mälımdeme jasady.
Mälımdemede Odaq deputat Qazybek İsa kötergen mäselelerdıŋ basym bölıgı būǧan deiın Jazuşylar odaǧy tarapynan bırneşe ret köterılıp, keibırı jüzege asyp jatqanyn atap öttı. 2023 jyly Memleket basşysy Qasym-Jomart Toqaev Jazuşylar odaǧynyŋ töraǧasy Mereke Qūlkenovtı qabyldaǧanda da osy taqyryptar qozǧalǧan. Prezident jas qalamgerlerge erekşe köŋıl bölıp, memleket tarapynan qoldau şaralary jalǧasatynyn aitqan edı. Būl baǧyttaǧy jūmystar bügınde tūraqty türde jürgızılıp keledı.
Jyl saiyn berılıp kele jatqan memlekettık «Daryn» jastar syilyǧy, Prezidenttıŋ arnauly ädebi syilyǧy jäne «Aiboz» ūlttyq ädebi syilyǧy – osynyŋ aiǧaǧy. Jazuşylar odaǧy el ruhaniiatynyŋ tıregı retınde ūlttyq ädebiettı damytuda, qalamgerler buynynyŋ sabaqtastyǧyn qamtamasyz etude maŋyzdy röl atqaryp otyr. Ūiym Prezident Äkımşılıgımen, Ükımetpen, Mädeniet jäne aqparat ministrlıgımen, öŋırlık äkımdıktermen jäne şet memlekettermen bırqatar jobalardy jüzege asyryp keledı. Sondyqtan «qūzyrly oryndar ädebietke nemqūraily qaraidy» degen pıkır orynsyz dep sanalady.
Sondai-aq Odaq deputattyŋ «Ükımet pen ädebiet arasyndaǧy mädeni ünqatysudy jüielı dialogtık platforma retınde bekıtu» turaly ūsynysyna qatysty öz ūstanymyn bıldırdı. Mälımdemede: «Qalamger qauymy bilıkpen dialog jürgızumen uaqyt ötkızse, ädebiettı kım jasamaq?» – delıngen.
Jazuşylar odaǧy qazaq ädebietınıŋ bolaşaǧyn jas buynmen bailanystyryp, jas talanttardy qoldau men ädebi üderıstı jaŋa baǧytta damytuǧa basymdyq berıp otyr. «Qazaqstan Jazuşylar odaǧy müşelıgıne ümıtker» jobasy aiasynda 20 jasqa deiıngı jastarǧa arnalǧan baiqaular, şeberlık sabaqtary men ädebi keşter ötkızılıp keledı. Balalar ädebietın damytu maqsatynda halyqaralyq «Ertöstık» ädebi syilyǧy taǧaiyndalǧan. Būdan bölek, byltyr Almatyda ötken «Almatynyŋ jas jazuşysy» jobasy endıgı jyldan bastap Oqu-aǧartu ministrlıgınıŋ qoldauymen bükıl respublika boiynşa «Qazaqstannyŋ jas jazuşysy» atauymen jalǧasyn tabady.
2024–2025 jyldary QR Mädeniet jäne aqparat ministrlıgımen bırlesıp, üş ırı joba ıske asyrylǧan: «Jaŋa Qazaqstannyŋ ädebi-tanymdyq panoramasy», «Jazuşylardyŋ ädebi şeberlık mektebı» jäne «TMD elderınıŋ arhivterındegı qazaqstandyq jazuşylar turaly zertteu jūmystary». Soŋǧy joba aiasynda qazaq ädebietı institutyn aşu baǧytyndaǧy jūmystar jürgızılıp jatyr.
Qazırgı qazaq ädebietınde zamanaui adamnyŋ beinesın beineleitın şyǧarmalar jetkılıktı ekenı de aityldy. Būl – byltyr jaryq körgen 20 kıtap pen biyl jaryq köretın taǧy 20 eŋbekten anyq körınedı. 2026 jyldan bastap Odaq «Türkı älemınıŋ ädebietı» jobasyn jüzege asyrudy josparlap otyr. Joba aiasynda türkı elderınıŋ üzdık tuyndylary qazaq tılıne audarylyp, otandyq oqyrmanǧa ūsynylady. Būl baǧyttaǧy jūmys Äzırbaijan, Qyrǧyzstan jäne Özbekstan Jazuşylar odaqtarymen qol qoiylǧan memorandumdar arqyly bastalyp ketken.
Sonymen qatar, Jazuşylar odaǧy janyndaǧy proza, poeziia, balalar ädebietı, ädebi syn, dramaturgiia, audarma, detektiv jäne jastar keŋesterı ädebiettıŋ jan-jaqty damuyna serpın berıp otyr.
Mälımdemenıŋ soŋynda Odaq Basqarmasy deputattyq saualda köterılgen mäselelerdıŋ ūiymnyŋ kün tärtıbımen tolyq ündesetının atap öttı. «Qazaq ädebietı – ırgetasy berık, ruhani quaty zor, bolaşaǧy jarqyn ädebiet. Bız ädebiettı damytu ısınde memleketpen bırlese jūmys ısteudı, jas qalamgerlerge qoldau körsetudı jäne ūlttyq ruhaniiatty jaŋǧyrtudy basty mındetımız dep bılemız. Qazaq ädebietı – ūlt ruhynyŋ ainasy. Ony damytu – barşamyzdyŋ ortaq paryzymyz!» – delıngen mälımdemede.
