Qaraǧandy oblysynyŋ barlyq qala-audandarynda 9 mamyr künı Ūly Otan soǧysyndaǧy Jeŋıstıŋ 81 jyldyǧyna arnalǧan eske alu şaralary ötude.
Taŋ särıden bastap qaraǧandylyqtar «Mäŋgılık alau» memorialyna gül şoqtaryn qoiuda.
— Bız jyl saiyn Mäŋgılık alauǧa keluge tyrysamyz. Ūlymyzdy ertıp kelemız, ol bügıngı beibıt ömırımızge kımderdıŋ arqasynda qol jetkızgenımızdı tüsınsın deimız. Bızdıŋ äjemız tyl ardagerı bolǧan, sondyqtan būl estelıktı saqtau bız üşın öte maŋyzdy, — deidı Qaraǧandy tūrǧyny Evgeniia Kritovich.
Rekviem-mitingke oblys äkımı Ermaǧanbet Bölekpaev, äskeri qyzmetşıler, memlekettık organdardyŋ ökılderı, qoǧamdyq bırlestıkter men qala tūrǧyndary qatysty.
Soǧys jyldarynda qaza tapqandardy jinalǧandar bır minut ünsızdıkpen eske aldy.
Dästür boiynşa oblys basşylyǧy Ūly Otan soǧysynyŋ ardagerlerın arnaiy baryp qūttyqtady.
Olar Ūly Otan soǧysyna qatysuşylarǧa Memleket basşysy Qasym-Jomart Toqaevtyŋ Jeŋıs künıne arnalǧan qūttyqtauyn jetkızdı.
Qazırgı taŋda öŋırde maidanger alty ardager tūrady. Solardyŋ bırı — Mariia Şinkevich. Biyl ol 101 jasqa toldy. Ol mergender mektebın tämamdaǧannan keiın 19 jasynda maidanǧa attanǧan. 1945 jyldyŋ tamyzyna deiın 3-Belarus jäne Ukraina maidandarynda qyzmet ettı.
Mariia Şinkevich II därejelı Otan soǧysy ordenımen, ekı märte «Erlıgı üşın» medalımen, «Germaniiany jeŋgenı üşın» medalımen jäne özge de nagradalarmen marapattalǧan. Soǧystan keiın eldı qalpyna keltıru jūmystaryna qatysty.
Ardager Jeŋıs künın Pragada qarsy alǧan. Ol älı künge deiın 9 mamyrdy ömırındegı eŋ basty mereke dep sanaidy.
— Bız Jeŋıstı taǧatsyzdana küttık ärı būl künnıŋ mındettı türde kelerıne sendık. Bügınde sol sättı tolqumen eske alamyn, — deidı Mariia Şinkevich. — Jastarǧa adal eŋbek etıp, ülkenderdı qūrmettep, bır-bırıne qamqor boludy tıleimın.
Soǧys jyldary Qazaqstannan maidanǧa 1,2 millionnan astam adam attanǧan.
Qaraǧandy oblysynan şamamen 60 myŋ adam äskerge şaqyrylyp, olardyŋ 25 myŋy elge oralmaǧan.
Keŋes Odaǧynyŋ Batyry ataǧy öŋırdıŋ 34 tumasyna berılse, taǧy 13 jerles Daŋq ordenınıŋ tolyq kavalerı atanǧan.
Qaraǧandyda jasaqtalǧan 77-artilleriialyq polk Stalingradtan Bratislavaǧa deiıngı jauyngerlık joldan ötken.
