2026 jylǧy 22 mamyrda Almaty qalasyndaǧy «Ǧylym ordasy» ǧimaratynda «India’s Strategic Autonomy: A Special Feature» kıtabynyŋ tanystyrylymy jäne «Incredible India: New Opportunities for Kazakhstan» atty halyqaralyq döŋgelek üstel öttı. Is-şarany Qazaqstan Respublikasy Prezidentınıŋ janyndaǧy Ūlttyq ǧylym akademiiasynyŋ Halyqaralyq qatynastar zertteu ortalyǧy men Qazaq ūlttyq qyzdar pedagogikalyq universitetı bırlesıp ūiymdastyrdy.
Is-şara Ündıstannyŋ qazırgı halyqaralyq qatynastar jüiesındegı strategiialyq rölın, sondai-aq Qazaqstan men Ündıstan arasyndaǧy yntymaqtastyqtyŋ jaŋa mümkındıkterın talqylauǧa arnalǧan maŋyzdy halyqaralyq saraptamalyq alaŋǧa ainaldy. Jiynǧa diplomattar, ǧalymdar, zertteuşıler men halyqaralyq sarapşylar qatysty.
Is-şara barysynda qatysuşylarǧa Qazaqstan Respublikasy Prezidentınıŋ janyndaǧy Ūlttyq ǧylym akademiiasynyŋ ǧylymi-tehnikalyq yntymaqtastyq bölımınıŋ basşysy Anar Mūhtarova, Qazaqstan Respublikasy Syrtqy ıster ministrlıgınıŋ Almaty qalasyndaǧy ökıldıgınıŋ saiasi top jetekşısı Almaşa Arystanqyzy Arenova, sondai-aq Ündıstannyŋ Qazaqstandaǧy būrynǧy Tötenşe jäne Ökılettı Elşısı, India Central Asia Foundation ūiymynyŋ prezidentı Aşok Kumar Şarma qūttyqtau söz söiledı.
Baǧdarlamanyŋ maŋyzdy bölıgı «India’s Strategic Autonomy: A Special Feature» kıtabynyŋ tanystyrylymy boldy. Basylymdy Radj Kumar Şarma tanystyryp, eŋbektıŋ negızgı mazmūnyna, Ündıstannyŋ strategiialyq avtonomiiasy, syrtqy saiasi basymdyqtary jäne qazırgı halyqaralyq qauıpsızdık jüiesındegı ornyna qatysty maŋyzdy mäselelerge toqtaldy.
Kıtapqa saraptamalyq şolu jasaǧan Halyqaralyq qatynastar zertteu ortalyǧynyŋ direktory Duman Qūrmanǧazyūly Jekenov atalǧan eŋbektıŋ qazırgı geosaiasi özgerıster jaǧdaiyndaǧy özektılıgın jäne Ündıstan men Ortalyq Aziia memleketterı arasyndaǧy yntymaqtastyqty zertteudegı maŋyzyn atap öttı.
Saraptamalyq sessiia aiasynda halyqaralyq qatynastar jäne şyǧystanu salasyndaǧy mamandar baiandamalar jasady. Äl-Farabi atyndaǧy Qazaq ūlttyq universitetınıŋ şyǧystanu fakultetınıŋ professory Laura Gibratqyzy Erekeşeva Qazaqstan men Ündıstan arasyndaǧy qatynastardyŋ damu perspektivalaryna toqtaldy. India Central Asia Foundation ūiymynyŋ direktory jäne Niu-Delidegı MERI Centre for International Studies ortalyǧynyŋ jetekşısı Ramakant Dvivedi Ündıstan men Ortalyq Aziia elderı arasyndaǧy yntymaqtastyqtyŋ jaŋa baǧyttaryn ūsyndy. ERI Research Center ortalyǧynyŋ aǧa ǧylymi qyzmetkerı, PhD doktory Albina Mirzahanqyzy Mūratbekova halyqaralyq özara ıs-qimyldyŋ zamanaui ürdısterıne arnalǧan analitikalyq baiandama jasady.
Pıkırtalas barysynda qatysuşylar Qazaqstan men Ündıstan arasyndaǧy akademiialyq, mädeni jäne strategiialyq yntymaqtastyqty nyǧaitu mäselelerın talqylap, bırlesken ǧylymi jäne bılım beru bastamalaryn damytu perspektivalary jönınde pıkır almasty.
Is-şara Qazaqstan men Ündıstan arasyndaǧy serıktestıktı keŋeituge degen özara qyzyǧuşylyqtyŋ joǧary ekenın taǧy bır märte däleldep, ekı el arasyndaǧy saraptamalyq jäne ǧylymi dialogty damytuǧa eleulı üles qosty.
Ūiymdastyruşylar barlyq spikerlerge, qatysuşylar men qonaqtarǧa belsendı qatysqandary jäne mazmūndy pıkır almasuǧa üles qosqandary üşın alǧys bıldırıp, halyqaralyq ǧylymi yntymaqtastyqty odan ärı damytu maŋyzdy ekenın atap öttı.
