Memleket basşysy Qasym-Jomart Toqaev Briusselde Europalyq Keŋestıŋ prezidentı Antoniu Koşta jäne Europalyq Komissiianyŋ Prezidentı Ursula fon der Liaienmen kezdesu ötkızdı, dep habarlaidy "Adyrna" ūlttyq portaly.
Basşylar kezdesuınde Qazaqstan men Europalyq Odaq arasyndaǧy serıktestıktı odan ärı damytu mäselelerı talqylandy.
Kelıssözder barysynda Prezident ekıjaqty qarym-qatynas soŋǧy jyldary jaŋa sapaly deŋgeige köterılgenın atap öttı. Onyŋ aituynşa, özara senım men qūrmetke negızdelgen yntymaqtastyq bügınde strategiialyq sipat alyp, türlı saladaǧy bailanystardy keŋeituge mümkındık berıp otyr.
Prezident Toqaev Qazaqstannyŋ Europalyq Odaqpen özara tiımdı ärıptestıktı nyǧaituǧa müddelı ekenın aityp, jaqynda qol qoiylǧan qūjattar men memorandumdar osy baǧyttaǧy jūmystyŋ naqty nätijesı ekenın jetkızdı. Sondai-aq ol elımız EO-men keŋeitılgen serıktestık jäne yntymaqtastyq turaly kelısımge qol qoiǧan jäne ony ratifikasiialaǧan Ortalyq Aziiadaǧy alǧaşqy memleket ekenın eske saldy. Kezdesu barysynda sauda-ekonomikalyq jäne investisiialyq yntymaqtastyqqa erekşe köŋıl bölındı. Prezidenttıŋ aituynşa, Europalyq Odaq Qazaqstannyŋ negızgı sauda jäne investisiialyq serıktesterınıŋ bırı sanalady. Europalyq kompaniialar el ekonomikasynyŋ türlı sektorlarynda belsendı jūmys ıstep, investisiialyq jobalardy jüzege asyryp keledı.
Öz kezegınde Europalyq Komissiianyŋ prezidentı Ursula fon der Liaien soŋǧy on jylda Qazaqstan men Europalyq Odaq arasyndaǧy sauda ainalymy aitarlyqtai ösıp, özara bailanystardyŋ qarqyny küşeigenın aitty. Ol taraptardyŋ auyl şaruaşylyǧy siiaqty baǧyttarda ärıptestıktı ärtaraptandyruǧa, saudadaǧy kedergılerdı azaituǧa jäne investisiialyq mümkındıkterdı keŋeituge müddelı ekenın jetkızdı.
Ursula fon der Liaien habarlauynşa, Qazaqstan men Europalyq Odaq arasyndaǧy vizalyq rejimdı jeŋıldetu mäselesı boiynşa jürgızılıp jatqan kelıssözder aiaqtaluǧa jaqyn. Ol taraptar vizalyq räsımderdı jeŋıldetu jäne readmissiia turaly kelısımder boiynşa belsendı jūmys jürgızıp jatyr. Qazırgı taŋda osy baǧyttaǧy kelıssözder ıs jüzınde soŋǧy kezeŋıne jetken.
