Probasiia qyzmetınıŋ esebınde tūrǧan azamattardy qoǧamǧa qaita beiımdeude jūmysqa ornalastyru, bılım alu jäne qoǧamnyŋ qoldauy – eŋ basty şarttar. Adamǧa ekınşı mümkındık beru jäne qaita qūqyq būzuşylyq jasau qaupın azaitu joldary Qaraǧandy oblysynyŋ prokuraturasy men äkımdıgı ūiymdastyrǧan «Jarqyn bolaşaqqa bastar jol» forumynda talqylandy.
Forum «Zaŋ jäne Tärtıp» jalpyūlttyq ideologiiasyn ıske asyru aiasynda öttı.
Memleket, biznes jäne qoǧamdyq ūiymdar zaŋ būzǧan azamattardyŋ qalypty ömırge qaita oraluyna qoldau körsetu üşın küş bırıktırıp otyr. Negızgı maqsat – olardy tek jūmyspen qamtu ǧana emes, sonymen qatar mamandyq meŋgeruge, äleumettık bailanystaryn qalpyna keltıruge mümkındık jasau. Forum qatysuşylarynyŋ pıkırınşe, däl osyndai keşendı täsıl qaita qūqyq būzuşylyqtyŋ aldyn aluǧa yqpal etedı.
Qaraǧandy oblysynyŋ äkımı Ermaǧanbet Bölekpaev öŋırde probasiia qyzmetınıŋ esebınde tūrǧan azamattardy qoldauǧa baǧyttalǧan keşendı şaralar bügınde jüielı türde jüzege asyrylyp jatqanyn atap öttı.
— Memleket basşysy Qasym-Jomart Toqaev qylmystyq-atqaru jüiesınıŋ basty maqsaty tek jazalau ǧana emes, adamnyŋ tüzeluıne kömektesıp, ony qoǧamdaǧy tolyqqandy ömırge qaita beiımdeu ekenın erekşe atap öttı. Memleket jaŋa mümkındıkterge jol aşa alady, jūmys beruşıler eŋbek ornyn ūsyna alady. Alaida jaŋa ömırge qadam jasaudy adamnyŋ özı ǧana taŋdaidy, — dedı öŋır basşysy.
Qaraǧandy oblysynyŋ prokurory Mūrat Tıleuberdiev öŋırde probasiia qyzmetınıŋ esebınde tūrǧan azamattardy qaita äleumettendıru baǧytyndaǧy jüielı jūmystar jalǧasyp jatqanyn atap öttı.
— Bügınde oblystyŋ probasiia qyzmetınıŋ esebınde myŋnan astam azamat tūr. Jergılıktı atqaruşy organdardyŋ, jūmyspen qamtu qyzmetterınıŋ jäne jūmys beruşılerdıŋ bırlesken jūmysynyŋ nätijesınde jüzdegen azamat tūraqty jūmysqa ornalastyryldy. Käsıptık oqytu jäne äleumettık kömek körsetu baǧdarlamalary jüzege asyrylyp keledı. Äleumettık süiemeldeudı ūiymdastyruda memlekettık organdardyŋ jūmysyn bırıktırgen Socium sifrlyq platformasy men FSM Social mobildı qosymşasynyŋ engızıluı maŋyzdy qadam boldy. Būl jüieler arqyly azamattarǧa jūmysqa ornalasuǧa, qūjattaryn qalpyna keltıruge, medisinalyq kömek, bılım alu, äleumettık tölemder räsımdeu jäne özge de ömırlık maŋyzdy mäselelerdı şeşuge jan-jaqty qoldau körsetıledı. Eger bügıngı forumnan keiın adamdar öz ömırın özgertuge bolatynyna sense, jūmys beruşıler öz käsıporyndarynyŋ esıgın aiqara aşsa, al memlekettık organdar der kezınde qajettı qoldau körsetse, köptegen otbasy erteŋgı künge degen senımın qaita nyǧaitady, — dedı Mūrat Tıleuberdiev.
Jūmyspen qamtu baǧytyndaǧy jūmystar bügınde naqty nätijesın berude. Jyl basynan berı oblysta 600-den astam jūmys beruşınıŋ qatysuymen 60 bos jūmys oryndary järmeŋkesı ūiymdastyryldy. Sonymen qatar probasiia qyzmetınıŋ esebınde tūrǧan azamattar üşın kvotalanǧan jūmys oryndary da bölınude.
Osyndai mümkındıktı paidalanǧandardyŋ bırı – qaraǧandylyq Oljas Ersain. Probasiia qyzmetınıŋ esebıne qoiylǧannan keiın oǧan «Qaraǧandy-Nan» käsıpornyna resmi türde jūmysqa ornalasuǧa kömek körsetılgen. Qazır ol mūnda jarty jylǧa juyq uaqyt eŋbek etıp keledı.
— Probasiia qyzmetınıŋ esebıne tūrǧan kezde menıŋ tūraqty jūmysym bolǧan joq. Mansap ortalyǧy arqyly jūmysqa ornalasuyma kömektestı. Qazır tūraqty jalaqy alyp jürmın ärı osy jerde eŋbek etudı jalǧastyrǧym keledı. Adamǧa jūmys tabuǧa qoldau körsetılse, onyŋ jaŋa ömır bastap, adal eŋbekpen bolaşaǧyn qūruǧa mümkındıgı paida bolady, — deidı Oljas Ersain.
Osyndai qiyndyqtardy Rahat Jienqūlov ta bastan ötkergen.
— Probasiiadan keiın jūmys tabudyŋ öte qiyn ekenıne özım köz jetkızdım. Maǧan jūmysqa ornalasuǧa kömektestı, būl menıŋ ömırımdı özgerttı. Osyndai ıs-şaralar adamdarǧa aiaǧynan nyq tūryp, qaitadan zaŋ būzbauǧa naqty mümkındık beredı, — deidı ol.
Forumnyŋ praktikalyq qorytyndysy retınde yntymaqtastyq turaly memorandumǧa qol qoiyldy. Qūjat probasiia qyzmetınıŋ esebınde tūrǧan azamattardy jūmyspen qamtu, käsıbi oqytu, äleumettık beiımdeu jäne qaita äleumettendıru mäselelerı boiynşa memlekettık organdardyŋ, jūmys beruşılerdıŋ jäne qoǧamdyq ūiymdardyŋ bırlesken jūmysyn közdeidı.
Forum barysynda Qaraǧandy oblysy prokuraturasynyŋ alǧys hattarymen qiyn ömırlık jaǧdaiǧa tap bolǧan azamattardy jūmyspen qamtuǧa üles qosyp jürgen käsıporyn basşylary marapattaldy.
«220 Volt» kompaniiasynda probasiia qyzmetınıŋ esebınde tūrǧan segız azamat eŋbek etedı.
— Bız jazasyn ötep jürgen adamdarǧa jūmys tauyp beruge kömekteskımız keldı. Bügınde käsıpornymyzda segız bılıktı maman eŋbek etıp jür. Olar öz jūmysyna jauapkerşılıkpen qaraidy. Aldaǧy uaqytta būl baǧyttaǧy jūmysty keŋeitudı josparlap otyrmyz, — dedı kompaniianyŋ tehnikalyq menedjerı Änuar Omarov.
Forumnyŋ ekınşı bölımınde qatysuşylar adamnyŋ jıbergen qatelıgınen keiın qoǧamdaǧy tolyqqandy ömırge qaita oraluynda otbasynyŋ, bılımnıŋ, eŋbektıŋ jäne qoǧamdyq qoldaudyŋ rölın talqylady.
Foto: Aleksandr Marchenko
