Aldymen üide otyryp özımızdıŋ nömırı 12-şı emhanaǧa telefon şaldyq. Otyz jyldan berı osynda tırkeulımız ǧoi.
- Ne mäselemen?- dep sūrady ar jaqtaǧy dauys.
- Jürgızuşı kuälıgıne qajet medisinalyq komissiiadan ötıp, anyqtama aluym kerek edı. Osynda tırkeulımın. Jasym 68-de,- dep ekı ret sūratqyzbai barlyq aqparatty bırden üiıp-tögıp tastaǧanbyz.
Beker aityppyz.
- Bızdıŋ emhanada ondai komissiia joq,- dedı ar jaqtaǧy dauys.
- Endı qaitemın?
- Jandasov, 6-ǧa baryŋyz. Sonda komissiia bar. Äitpese, Kablukovada ötuge bolady,- dedı ar jaqtaǧy dauys janaşyrlyqpen.
Sonymen erteletıp Jandosov, 6- ǧa kelgenbız. Tırkeletın bölmede öte sūlu qyz otyr eken.
- Qalqam, komissiiadan ötetın edım…
- Ata, men mūnda jai otyrmyn. Qazır tırkeitın kısı keledı.
Sūlu qyzǧa qarap jaidan jai saǧattap otyruǧa peiıldımız ǧoi. Tek “ata” degenı qiyndau tidı. Qyz kompiuterdıŋ betıne, bız qyzdyŋ betıne qarap on bes minuttai otyrdyq. Läzzatty syrttan kırgen qyzmetker äiel būzdy.
- Ne şaruamen?
- Jürgızuşı kuälıgı üşın medisinalyq komissiiadan ötuge keldım.
- Bızde komissiia bolmaidy. Terapevt eŋbek demalysyna şyqqan.
Sölbıreiıp şyqtyq ta smartfondaǧy kartaǧa qaradyq. Kablukov köşesı Kekılbaev bolyp özgerıptı. “Ätteŋ, Äbekeŋe jyndyhanasy joq köşe būiyrmaǧan eken” dedı bır oiymyz. “Būǧan da täube” dedı ekınşı oiymyz.
İä, Kekılbaev köşesınıŋ boiynda “Psihikalyq densaulyq ortalyǧy” dep körsetıp tūr. Telefondary jazuly. Habarlasyp edık, “komissiia bar, 2-şı kabinetke kelesız” dedı.
Solai qarai attandyq. Äuezov köşesınıŋ şetı qoparylyp jatyr, Manas köşesı mülde qoparylyp jatyr, Jandosov köşesınıŋ qaptaldary qoparylyp jatyr, Rozybakievten Ötepovke būrylatyn tūs qoparylyp jatyr. Jer jüzınde köşe talqandaudan jarys ötse, Almaty bäigenı şappai alary haq.
Äsırese, Jandosovtan Rozybakievke solǧa qarai būrylar jer sūmdyq. O düniedegı qiiamet-qaiymnyŋ qyl köpırı būdan jeŋıl şyǧar dep oiladyq.
Äupırımdep Rozybakievke şyqsaq köldeneŋ köşedegı taqtaişaǧa “ Kliment Timiriazev” dep jazypty. Atyn jazbasa da bolar edı, sonşa älpeşteitındei qazaqqa nesı ötıptı.
Bızge salsa osy köşege akademik Joldasbekovtyŋ aty laiyq edı. Ony apardy da jarty şaqyrymdyq şolaq köşege bere saldy.
Sonymen psihikalyq densaulyq ortalyǧyna keldık. Kölık qoiar tūsy tar eken. Şyǧa berıs jaǧyna qoiyp edık, tura qarsymyzda polisiia degen jazuly qyzmettık avtokölık tūr eken. Işınde smartfon şūqylap qyzmetker otyr.
Terezesın qaǧyp:
- Qaraǧym, avtölıktı dūrys doǧardyq pa?- dep edık.
Ol smartfonnan basyn kötermesten “ary taman qoiu kerek” dedı. Ary tamanda bos jer joq. Osy kezde ışten ekınşı polisiia qyzmetkerı şyǧyp, “aǧa, maşinaŋyz tūra bersın” dedı.
Al qaisysyn tyŋdaisyŋ. Däu de bolsa kölıkte erıgıp otyrǧanynyŋ şenı ülken şyǧar dep, qaşan bır kölık oryn bosatqanşa kütıp tūrdyq.
“Ekınşı” kabinettıŋ esıgınıŋ aldy topyrlaǧan 65 jastan asqandar. Ükımettıŋ, oǧan qarasty ministrlıktıŋ jetı atasyn jıberıp jatyr. Kezekke tūrdyq.
Osy kezde kışı däret äbden qyştaǧan. Endı taŋerteŋ Tūzdybastaudan şyqqaly, qalanyŋ keptelısımen jürgelı ekı saǧattan asqan. Därethanaǧa kelsek esıktıŋ syrtyna “zaniato” degen taqtaişa ılıngen. Bes minuttai küttık, eşkım şyqpaidy, eş dybys estılmeidı. Bolmaǧan soŋ aqyryn tartyp körsek, esık aşyq. Basymyzdy sūǧyp baiqasaq, ışınde eşkım joq.
Kırdık. Endı qarasaq ılmek joq. Oǧan alaŋdauǧa şama qalmaǧan…
Ekınşı kabinettegı kezegımız de kelgen eken. Ekı qyzmetker qatar qabyldap, qaǧaz toltyrady. Jalpy jolymyz bolatyn janbyz ǧoi, tura sūlu qyzǧa tap keldık.
Ol tölqūjatymyzdy alyp toltyryp jatqanda egdeleu ekınşı qyzmetkerıne eskertu aitpaq boldyq. Sūlu qyzdarǧa eskertu aitu daǧdymyzda bolmaǧan.
- Qaraǧym, därethanalaryŋda kürşek joq eken…
- Aǧa, ereje boiynşa jyndyhananyŋ därethanasynyŋ ışıne de, syrtyna da ılmek saluǧa rūqsat etılmeidı.
Kassaǧa 9 myŋ teŋgeden asatyn aqşa tölep, qaǧazdaǧy ret boiynşa alǧaşqy kabinetke kırdık.
Onda qyzmetker şaǧyn bankany alyp, qaqpaǧyna “OLJ” dep jazyp, belortasynan qara syzyq tartty.
- Myna deŋgeiden asyrmai kışı däretıŋızdı alyp kelıŋız.
Mäs-saǧan, bezgeldek.
Avtokölıkte qatyn salyp bergen taza suymyz bar edı. Sony ışıp keldık. Endıgı mındet — qara syzyqty saqtau. Bır qarasaq jetpei tūrmyz, jäne yşqynyp şekten asyr bere toqtadyq.
Apardyq, “OLJ-dy” ötkızdık.
- Kütıŋız.
Bızge deiın de yşqynyp alǧan 65-ten asqandar kütıp otyr, qataryna qosyldyq.
Osy kezde miymyz zyrq ettı. Keşe keşkılık monşamyzǧa tüskenbız. Qatynnyŋ arqasyn ysyp kelgen soŋ älgı qyzylqatqa tūndyrylyp, Altai baly qosylǧan “Arhangelskıden” dästürlı 50 gramm tartyp alyp edık qoi!
Tamyzdyŋ 25-ıne deiın Qūdaidyŋ qanşama künı bar, nesıne pysyqsi qaldyq?
Osy kezde ışten familiiamyzdy aitty. Baiaǧyda QazMU-ge emtihan tapsyrǧan bozbala şaǧymyzdan beter qobalji kırdık.
- Taza!
Uh! Negızı özımız taza adambyz ǧoi!
