Qazaqstan älemdegı bäsekege qabılettı 40 ekonomikanyŋ qataryna kırdı. Būl turaly Halyqaralyq menedjmenttı damytu instituty (IMD) jariialaǧan World Competitiveness Ranking 2026 reitingınde körsetılgen, dep habarlaidy "Adyrna".
Qazaqstan biylǧy jahandyq reitingte 38-orynǧa jaiǧasty. Atalǧan zertteu elderdıŋ ekonomikalyq jäne biznestıŋ tūraqty damuyna qolaily jaǧdai qalyptastyru mümkındıgın baǧalaidy.
IMD elderdıŋ bäsekege qabılettılıgın tört negızgı baǧyt boiynşa saralaidy. Olar – ekonomikanyŋ jaǧdaiy, memlekettık basqarudyŋ tiımdılıgı, biznestıŋ tiımdılıgı jäne infraqūrylym. Baǧalau barysynda resmi statistikamen qatar, biznes ökılderı arasynda jürgızılgen saualnama nätijelerı de eskerıledı.
Qazaqstan bırqatar körsetkış boiynşa joǧary nätijege qol jetkızgen. Atap aitqanda, salyq saiasaty boiynşa 9-orynǧa, halyqaralyq saudada 19-orynǧa, eŋbek naryǧy men basqaru täjıribesı boiynşa 20-orynǧa ie boldy. Sondai-aq biznestegı qūndylyqtar men ūstanymdar körsetkışı boiynşa da Qazaqstan 20-satyǧa tūraqtaǧan.
Būdan bölek, jūmyspen qamtu salasynda el 26-oryndy, institusionaldyq orta boiynşa 29-oryndy, önımdılık pen tiımdılık körsetkışınde 32-oryndy ielendı. Al ışkı ekonomika boiynşa Qazaqstan 33-orynǧa jaiǧasty.
Halyq sany 20 millionnan asatyn memleketter arasynda Qazaqstan 15-orynda tūr. Al Europa, Taiau Şyǧys jäne Afrika elderı kıretın topta respublika 25-satydan körındı.
Zertteu mälımetınşe, 2025 jyly Qazaqstannyŋ jalpy ışkı önımı 306,2 milliard dollardy qūraǧan. El ekonomikasynyŋ naqty ösımı 6,5 paiyzǧa jetıp, būl körsetkış boiynşa Qazaqstan reitingke engızılgen ekonomikalar arasynda 6-oryn alǧan.
Jan basyna şaqqandaǧy satyp alu qabıletınıŋ paritetı boiynşa JIÖ 45 286 dollardy qūrady. Qazaqstandaǧy jūmys küşınıŋ sany 9,77 million adam dep baǧalansa, jūmyssyzdyq deŋgeiı 4,6 paiyz boldy.
IMD sarapşylary Qazaqstan üşın 2026 jylǧy basym mındetterdıŋ qatarynda memlekettık basqaru jüiesıne jasandy intellekt tehnologiialaryn engızudı, joǧary tehnologiialyq öndırısterge investisiia tartudy jäne tranzittık äleuettı arttyrudy ataǧan. Sonymen bırge käsıptık bılım beru jüiesın jaŋǧyrtu jäne jasandy intellekt negızınde su resurstaryn basqarudyŋ zamanaui jüiesıne köşu qajettıgı atap ötıldı.
IMD World Competitiveness reitingı 38 jyldan berı jariialanyp keledı. Ony äzırleu kezınde halyqaralyq, ūlttyq jäne öŋırlık ūiymdardyŋ statistikalyq derekterımen qatar, biznes basşylarynyŋ pıkırlerı de eskerıledı. 2026 jylǧy zertteuge şamamen 6900 top-menedjer qatysqan.
