Türkıstan qalasyndaǧy Qolönerşıler ortalyǧynda «Turkistan Brand Craft Fair – 2026» halyqaralyq qolönerşıler jäne ekologiialyq önımder järmeŋkesı bastaldy.
Järmekenıŋ saltanatty aşyluyna Türkıstan oblysy äkımınıŋ orynbasary Ertai Altaev arnaiy qatysyp, ıs-şaranyŋ maŋyzyna toqtaldy.
– Barşaŋyzdy Türkıstan törınde ötıp jatqan «Turkistan Brand Craft Fair-2026» festivalınde qarsy alu men üşın ülken qūrmet. Özderıŋızge belgılı, turizm Türkıstan oblysy ekonomikasynyŋ basym salasynyŋ bırı. Ükımet jäne äkımdık tarapynan turizm salasyn damytuǧa jüielı jūmystar jürgızılude. Turizm salasy damuy üşın ekonomikanyŋ barlyq salasy qatar damuy tiıs. Iаǧni, turizmnıŋ damuy barlyq salalarǧa bailanysty. Onyŋ ışınde qolöner qyzmetın damytu erekşe oryn alady. 2025 jyldyŋ 3 nauryzynda Memleket basşysy Qasym-Jomart Toqaev «Türkıstan qalasynyŋ erekşe märtebesı turaly» arnaiy zaŋǧa qol qoidy. Qabyldanǧan zaŋda qolöner salasyndaǧy şeberlerge memlekettık qoldau şaralary qarastyrylyp, jergılıktı qolönerşılerdıŋ käsıbın damytuǧa jäne önımderın ılgerıletuge jol aşyldy. Qazırgı taŋda Türkıstan qalasynda 40-tan astam qolönerşı eŋbek etude. Syrttan kelgen turister üşın jergılıktı qolöner tuyndylary basty qyzyǧuşylyqtyŋ bırı bolyp otyr. Sondyqtan da bız turizmdı damytuda qolönerşılerge jüielı qoldau körsetudı negızgı basymdyq retınde aiqyndap kelemız. Bügıngı körme qolönerşılerge täjıribe almasuǧa, önımderın halyqaralyq deŋgeide nasihattauǧa jäne jaŋa serıktestık bailanystar ornatuǧa ülken mümkındık. Barşaŋyzdy ūlttyq önerımızdı ūlyqtauǧa, Türkıstandy halyqaralyq deŋgeidegı ırı turizm ortalyǧyna ainaldyruǧa şaqyramyn! – dedı Ertai Kenjebekūly.
Is-şara barysynda oblys äkımınıŋ orynbasary Ertai Altaev, Türkiianyŋ «KUYAM» qolönerşıler bırlestıgınıŋ töraiymy Zubeide Atan Būlbūl jäne Ündıstannyŋ World Crafts Council ūiymynyŋ vise-prezidentı Sundip Kumar järmeŋkenı aralap kördı. Oblys äkımınıŋ orynbasary şeteldık qonaqtarǧa järmeŋkede ūsynylǧan qolöner būiymdaryn tanystyrdy.
Järmeŋkege elımızdıŋ barlyq öŋırınen jäne şetelden 200-ge juyq şeber qatysyp jatyr. Olar özderınıŋ bıregei tuyndylaryn köpşılık nazaryna ūsynuda. Mūnda keramika, aǧaş, bylǧary, metall, kiız jäne toqyma būiymdary, ūlttyq jäne dizainerlık kiımder, zergerlık būiymdar, avtorlyq kädesyilar, sondai-aq tabiǧi ärı ekologiialyq taza önımder qoiylǧan.
Järmeŋkenıŋ maqsaty – qolönerdı, kəsıpkerlıktı, turizmdı, kreativtı industriiany jəne halyqaralyq yntymaqtastyqty bır alaŋda toǧystyratyn jaŋa formattaǧy halyqaralyq platforma qalyptastyru.
«Open Turkistan» turistık aqparattyq ortalyǧynyŋ direktory Asqar Abubakirovtyŋ aituynşa, elımızde erekşe önım jasaityn talantty şeberler köp. Bıraq olardyŋ barlyǧynda zamanaui qaptama, marketing, sifrlyq ılgerıletu jəne jaŋa naryqtarǧa şyǧu mümkındıgı bırdei emes. Osyǧan bailanysty järmeŋkenıŋ basty erekşelıgı – qolönerdı tek saqtap qana qoimai, ony bäsekege qabılettı önım men brendke ainaldyruǧa mümkındık beru. Mūnda qatysuşylar öz önımderın tanystyryp qana qoimai, tıkelei satuǧa, jaŋa tūtynuşylar men ıskerlık serıktester tabuǧa mümkındık alady. Al keluşıler būiymdardy tıkelei şeberlerden satyp ala alady.
Biylǧy järmeŋkege «Atameken» Ūlttyq käsıpkerler palatasymen bırlesıp, respublikalyq «Bır auyl – bır önım» jobasynyŋ finalisterı de arnaiy şaqyrylǧan. Būl bastama auyldyq jerlerdegı öndıruşılerge öz önımderın keŋ auditoriiaǧa, turisterge jäne biznes ökılderıne tanystyryp, naryq aiasyn keŋeituge mümkındık beredı.
Aita ketsek, oblysta turizmdı damytu baǧytynda da jüielı jūmystar jürgızılude. 2026 jyldyŋ 8 aiynyŋ qorytyndysy boiynşa oblystyŋ turizm salasynda aitarlyqtai nätijelerge qol jetkızıldı. Ornalastyru oryndarynda qyzmet körsetılgen turister sany 347,6 myŋ adamǧa jetıp, 2018 jylmen salystyrǧanda ekı ese artty. Tabiǧi aumaqtarǧa kelgen turister aǧyny tört esege ösıp, 161,5 myŋ adamdy qūrady. Qonaqüi jäne ornalastyru qyzmetterınıŋ kölemı 8,5 mlrd teŋgege jetıp, 2018 jylmen salystyrǧanda jetı esege artty. Al ornalastyru oryndaryndaǧy tösek-oryn sany 10 335-ke jetıp, ekı esege köbeidı.
Turizmdı damytuǧa baǧyttalǧan jüielı jūmystardyŋ nätijesınde öŋır ekonomikasyna tartylǧan investisiialar kölemı 612 mlrd teŋgeden asty. Sonyŋ arqasynda salada 19,2 myŋ jaŋa jūmys orny aşyldy. Bügınde oblysta qonaq üiler, hostelder, demalys aimaqtary men balalar lagerlerın qosa alǧanda, 278 ornalastyru nysany jūmys ısteidı. Būl körsetkış 2018 jylmen salystyrǧanda ekı ese ösken. Sonymen qatar Türkıstan oblysy elımızde emdık-sauyqtyru turizmı boiynşa köş bastap tūr. Respublikadaǧy 175 sauyqtyru mekemesınıŋ 117-sı Türkıstan oblysynda ornalasqan. Būl körsetkış 2018 jylmen salystyrǧanda üş esege köp.
